Heva snekke og hindre oljesøl

Søndag morgon blei det oppdaga at ei plastsnekke på rundt 30 fot hadde gått under vatn på Drange.

– Dei var redde for at båten skulle ta med seg flytebrygga under vatn, så dei kappa fortøyingane før vi kom fram, fortel varabrannsjef Arne Monsen.

Det var mykje drivstoff i båten og noko av det lak ut.

– Men det samla seg fint under isen, og eingongs-lensene vi bruker tok unna mykje.

Heva og fjerna

Samba AS kom til med arbeidsbåten MS Molly. Os brannvesen sine dykkarar, som laurdag kveld gjorde seg klare til å henta ein mann som ramla på sjøen i Os hamn, fekk bryta overflata i dag.

– Dei heva båten på null komma niks og vi brukte berre eit kvarter på å lensa den. Så lempa dei den på dekk og køyrde til basen sin på Amundsneset på Sundøy, fortel Monsen.

Lenser ligg framleis ute. Os brannvesen skal til Drange for å sjekka status måndag morgon.

Oppdatert måndag formiddag: Det ser greit ut i Drangsvågen, med unntak av noko ubetydeleg shine i overflata, og brannvesenet avsluttar på staden.