– Ikkje mat svanene!

I samband med politisk kvart i Plan- og bygningsutvalet (PBU) blei Os hamn og den store ansamlinga av svaner tatt opp.

– "Havnesjefen" døydde i fjor. Det har vel kome tredve nye til her no. Er det nokre tankar omkring den problemstillinga. Er det foretatt seg noko med tanke på svanene, undra Terje Sperrevik (TvS).

– Sist eg talte var vi no oppe i 56 svaner. Dei opererer som ein flokk og svøm stiller og fredleg inne imellom båtane. Så det ser ut til å vera ein fredleg flokk, innleia Aina Tjosås, kommunalsjef for samfunnsutvikling i Os kommune.

Mating eit problem

Når ho først var inne på svaneflokken kom ho med ei innstendig oppmoding.

– Vi ser folk som kjem med heile boss-sekkar for å gje dei mat. Slik kan vi ikkje ha det. Folk må slutta å mate dei, dei klarer heilt fint å finna sin eigen mat. Det håper eg media og de i PBU kan hjelpe oss med å få ut, poengterte Tjosås.