Ingen opptur i Førde

Os sto med 7 sigrar og 2 tap før dagens bortekamp mot ubesigra Førde (siger i 8 av 8).

– Vi stilte dessverre med ein del sjukdom i troppen, og starta kampen utan heilt å ha det rette tenningsnivået, synest Os-trenar Trond Førde Eriksen.

Førde - Os 29-17 (16-10)
Os: Vibeke Ingebrigtsen, Elise Hjelle 3, Line Hjelle Berentsen 3 (2 på straffe), Madeleine Hjertnes 2, Tonje Hjertnes 2, Emilie Halhjem 2, Hilde Kristine Røttingen 2, Mia Torp Nielsen 1, Liv Pauline Lunde og Thiet Dang.

Os leia frå start, men trenaren synest tidleg at han såg at dei ikkje hang heilt med. Ti minutt før pause låg dei under 11-5.

– Det kom seg heldigvis veldig etter ein timeout, og vi gjekk opp i 11-9.

Til pause sto det likevel 16-10.

– Ikkje uslåelege

– Vi starta 2. omgang glimrande, kriga i forsvar og kom oss tre mål bak. Men så kom ein serie med avgjerder i tvilsame situasjonar som ikkje gjekk vår veg. Vi kom 6-7 mål bak og etter dette kom vi oss ikkje inn igjen i kampen.

– Det var ikkje vår verste kamp, trass sjukdom og sterk motstand. Vi hadde to veldig gode periodar og har fått sjå at Førde ikkje er uslåelige, seier Førde Eriksen på veg heim frå Sogn og Fjordane.

Heime mot Fana 2 før jul

Neste kamp er den siste før jul. Den går heime mot Fana 2 onsdag 14. desember.

Fana 2 står med 4-2-4 etter ti kampar.

TERMINLISTE OG TABELL