Ingen stoppa på 30 minutt

Onsdag i 23.40-tida blei ein hjort påkjørt i 80-sona på E39 mellom Mobergsbrua og Liafjellstunnelen.

– Eg hadde retning Halhjem då hjorten kom springande frå venstre og kryssa vegen. Eg trur ikkje eg rakk å bremsa noko særleg, så det blei eit kraftig smell, fortel bilførar Kim Moo frå Os.

Han var åleine i bilen og følte seg litt prega etter ulykka, men han var ikkje skadd. Hjorten blei råka i bakbeina, men sprang vidare opp mot Liafjellet.

– Kva om eg var skadd?

– Eg ringte politiet og viltkontakten blei varsla. Bilen fekk eg litt ut av vegen så trafikken kunne gå forbi.

Og trafikken dundra forbi ulykkesstaden mens Kim blei sitjande i bilen i grøfta i 80-sona.

– Men på den halvtimen eg venta på at viltkontakten skulle koma var det ikkje éin som stoppa for å høyra om det sto greit til med meg.

– Heller ikkje då eg sto utanfor bilen var det nokon som sveiva ned ruta for å høyra om alt var ok. Det reagerer eg på. Kva om eg eller nokon i bilen var skadd?

Pliktar å stoppa

Det er ikkje berre involverte i trafikkulykker som har plikter.

«Enhver som med eller uten skyld er innblandet i trafikkuhell, skal straks stanse og hjelpe personer og dyr som er kommet til skade, og for øvrig delta i de tiltak som uhellet gir grunn til. Denne plikt har, om det er nødvendig, også andre som er i nærheten eller som kommer til stede.» § 12. Plikter ved trafikkuhell.

Eit svært utsett vegstykke

Viltkontakt Espen Andersen var ikkje med på ettersøk i går, men fortel at ein ekvipasje var ute i natt og to andre i heile formiddag fram til lunsj.

– Dei fann hjorten og den ser ut til å vera i fin nok form til at vi ikkje treng å avliva den.

Når det kjem til vegstykket rundt Liafjellstunnelen kjem han nok ein gong med ei åtvaring.

Måndag i førre veke kjørte ein buss på ein hjort på same stad, i 2011 blei ein bukk påkjørt ved tunnellen. Året før, i 2010, fekk ein barnefamilie ein kronhjort på 120 kilo inn frontruta på den andre sida av tunnelen.

– Med 70- og 80-sone rundt tunnelen kan det bli kraftige samanstøyt. Dette er eit område der det er verdt å vera ekstra varsame.