Innstiller på Kuhnle

Os Hovudavløpsreinseanlegg (OHARA) blei første gong handsama i kommunestyret 9. februar 2010. Då med innstilling om at anlegget skulle byggjast som fjellanlegg i Mobergshaugen med fjellanlegg på Kuhnle som alternativ.

Kommunestyret ba den gongen om at saka skulle utgreiast vidare med mellomanna konsekvensutgreiingar og tekniske/økonomiske løysingar i høve til lukt og støy frå reinseanlegget.

Velforeningar både i Mobergshaugen og på Kuhnle engasjerte seg i saka og fekk gjennom blant anna eit folkemøte i Osbadet hausten 2010 kommunen til å utgreiia Liafjellet som eit alternativ for både utlufting og etterkvart også plassering av anlegget.

Er forundra

I sakspapira til formannskapet kommande tysdag kjem det fram at saka no er ferdighandsama frå administrasjonen.

I innstillinga frå rådmannen skriv sakshandsamar Johannes Håkonsund: "Os kommunestyre godkjenner at Os hovudavløpsreinseanlegg (OHARA) skal byggjast som fjellanlegg ved Kuhnle med ventilasjonsutblås ved Kuhnlevika, i tråd med alternativ 2.2 i rapport: «Forstudie til nytt hovedavløpsrensealegg i Os kommune. Fase 2 - Hovedrapport», dat 02.11.2011."

- Dette er ikkje i tråd med kva dei politiske partia og ordførerkandidatane deira sa før valet, seier Thor Morten Frey Sivertsen i velforeningane.

Sjå kva ordførarkandidatane meinte før valet då Midtsiden stilte dei spørsmålet om lokalisering og utlufting.

- Eg er forundra over at administrasjonen opprettheld valg av plassering til tross for at det er ei brei politisk einigheit i at dette ikkje er eit klokt val.

- Det vil i mine auge vera politisk umoralsk å gå tilbake på desse uttala no i etterkant, og direkte uærleg og respektlaust ovanfor veljerane, seier Frey Sivertsen.

Kuhnle framfor Liafjellet

I rapportane frå Norconsult som administrasjonen har støtta seg til i saka har ikkje konsulentane ville gje noko klar tilråding, men ut frå ei samla vurdering med vektlegging av arealbruk, utslepp til vatn, naboulemper, usikkerheit når det gjeld regulering, løysing i dagsona, drift, kostnadar og framdrift, har dei gjort følgjande prioritering:

1. Fjellanlegg ved Kuhnle med utlufting i Kuhnlevika
2. Fjellanlegg i Liafjellet med utlufting på Liafjellet
3. Fjellanlegg i Mobergshaugane med utlufting ved St. Hanshaugen

I saksframlegget skriv administrasjonen vidare:

"Eit anlegg i Liafjell vil verta vesentleg dyrare (40-45%) enn eit anlegg ved Kuhnle eller Mobergshaugane. Anlegget vil derimot ha eit medrekna mindre konfliktnivå med omsyn til nærmiljø enn anlegga ved Kuhnle og Mobergshaugane.

For fjellanlegg ved Kuhnle er det foreslått at ventilasjonsutblås/skorstein skal plasseast ved Kuhnlevika, nær dagens kloakkreinseanlegg. Forslaget inneber at kommunen bør vera restriktiv når det gjeld bygging innanfor influenssona for ventilasjonsutblås i området."

Har kontakta advokat

Aksjonistgruppa har ikkje tenkt å gje seg med å få anlegget lagt til andre plassar enn Kuhnle eller Mobergshaugen.

- Vi er klare til å ta opp kampen igjen og har rådført oss med advokat i høve til eit eventuelt søksmål vi har varsla kommunen om tidlegare i samband med plassering av anlegget i tettbygd område, seier ein kamplysten Frey Sivertsen.

- Det som skil Liafjellet frå Kuhnle i rapportane er mellom 3 og 500 kroner i auka årlege avgifter.

- No må ikkje kommunen gløyme at det faktisk er vi som innbyggjerar som skal ta denne utbygginga gjennom renovasjonsavgiftene og ikkje dei kommunale investeringsbudsjetta. Då bør dei òg lytta til kva vi vil, avsluttar Frey Sivertsen.

Saka skal no handsamast i formannskapet tysdag 31. januar før endeleg avgjer truleg fell i kommunestyret 14. februar.