Intensiv oppkjøring på Kuventræ

Bildeserie:

1 av 5

Over 40 spelarar fødd i 1999, 2000 og 2001 er i desse dagar samla på fotballcamp.

– Vi ønskjer å bli kjent med dei som vil noko ekstra, og at desse skal bli kjent med kvarandre. Dette er eitt av fleire tilbod vi har for dei som vil noko ekstra. Frå før har vi fotballfritidsordninga Telenor Xtra og det kjem fleire tilbod med tida, seier Lars Bakkerud.

Mykje av essensen på campen Os Turn Fotball arrengerer frå torsdag til i dag er kvar enkelt si innstilling til eigen utvikling.

– For å bli god så må du trena, og du må trena rett. Men du må også ønskja å bli god. Med denne fotballcampen vil vi gje kvar enkelt noko å jobba vidare med, både for seg sjølv og saman med laga sine.

Det går i teknikk, orientering og val, det meste i ulike spel-øvingar, alt i korte sekvensar.

– Her får spelarane oppleva intensive og effektive øvingar i høgt tempo saman med andre flittige og talentfulle ungdomar.

– Ein god måte å bli kjent

Ørjan Håland, tidlegare trenar for Os 2 og juniorlaget, held på med trenarutdanninga si og er saman med blant andre Bakkerud og A-lagsspelar Torkel Hjertnes ein av instruktørane på campen.

– Os, Nore Neset, Søre Neset og Eikelandsfjorden er representert. Klubbane har fått nominera sine spelarar. Nokre aktuelle spelarar er opptatt eller på ferie, men vi har ei fin gruppe her, synest Håland.

– Spelarane løftar seg når dei møter jamngode gutar frå andre klubbar, i tillegg har dei det gøy. Mange av desse kjem til å spela saman om nokre år og dette er ein fin måte for dei å bli kjent med kvarandre på.

Vil inn på allianselaget

To av deltakarane på fotballcampen, Even Hilland Lærum frå Os og Liam Samuel Askvik frå Nore Neset, fortel om nyttig input før seriestart.

– Det har vore mykje positivt. Torsdag kjørte vi mykje på pasningar i dag har det vore 1 mot 1 og 2 mot 2, fortel Even.

Liam tar også med seg mykje positivt frå campen.

– Eg jobbar med å koma meg inn på allianselaget og dette har vore nokre gode dagar. Eg føler sjølv at eg har blitt betre på fleire område på denne korte tida.