Interessa til topps

Bildeserie:

1 av 6

Etter at Os Turlag opna klatreveggen i Nore Neset Aktivitetshus i september 2012 har det tatt heilt av.

– I dag er det roleg, seier Kenneth Rastad i Os Turlag klatregruppa mens han ser på dei om lag 20 ungane som boltrar seg i klatreveggen, trygt sikra av ivrige eldsjeler.

– Frå oktober til mars ser det heilt annleis ut her.

– Gjennom vinteren har vi lagt heilt på grensa i høve det vi har kapasitet til.

– Det har vore mellom 50 og 60 ungar innom kvar første måndag i månaden når vi har open klatring.

– Køane har gått langt ut på golvet, fortel Rastad.

Lagar budrevegg og uteanlegg

Klatregruppa gler seg over den store deltakinga, men kjenner samstundes på at dei er heilt på grensa.

– Vi jobbar mellom anna med å få til ein utevegg og har fått avtale med ein grunneigar i Hegglandsdalen.

– Men det tar tid og kostar penger. Det er ikkje berre å setja i nokre boltar og starta klatringa. Éin ting vi har fått penger til er buldrevegg her i Nore Nesethallen.

– Vi søkte Gjensidigestiftinga og fekk midlar frå dei. Platene vi skal nytta er frå den gamle veggen på Sprek og Blid.

– Vi er i dialog med hallen om korleis vi skal gjera det og når det er ledig så vi kan montera den. Forhåpentlegvis får vi det til mot sommaren, seier klatreentusiasten, som ikkje legg skjul på at dei har eit ønskje om å òg få til ein klatrevegg i den nye hallen som skal byggast på Kuventræ.

– Behovet er der, det er det ikkje tvil om.

150 på kurs

Fleire gongar i året arrangerer Os Turlag brattkort-kurs, kurset du treng for å få klatra i dei fleste inneanlegga i Noreg og for å kunne sikra andre.

– Sidan vi starta opp har rundt 150 personar tatt kurset.

– Vi skal ha to kurs no i dei to kommande helgane. Framleis er det nokre plasser på kvart av kursa.

– Kursa er over laurdag og sundag og tek 10 timar, avslutter Rastad før han legg til at påmelding og informasjon finn ein på heimesida til Os Turlag.