Klar for beintøff finale-etappe

I heile haust har osingane, og resten av Noreg, kunne følgje lærar Gry B. Skarstein frå Lindesnes til Nordkapp. Klokka 20.30 i kveld går siste program på TVNorge og det blir avgjort om det er Steffen Falck-Antonsen, Victoria Birkeland eller Gry som stikk av med ein flunkande ny Toyota Rav og 380 000 premiekroner.

Finalefest i Oslo

Det blir i følgje programskaparane, som seg hør og bør ei beintøff etappe.

Heile gjengen som starta konkurransen er i dag samla i Oslo for å sjå den siste etappen saman. Kven som vinn er det berre dei tre i finalen som veit.

– Eg kom til Oslo allereie fredag og har vore ute og spist middag saman med nokre av dei andre deltakarane i helga. I kveld skal vi først ha ei samling med Lag Lindesnes, som var laget mitt, før vi møtast alle på festen for å sjå finalen, fortel Gry på telefon frå Oslo.

– Eg gruar meg til å sjå etappen for eg veit eg kjem til å syta, men gleder meg veldig til å treffe dei andre igjen. Eg har fått venner gjennom 71 grader Nord, som eg trur vil vera der for alltid.