Kolskogen matchvinnar mot Brann 2

Ole Martin Lekven Kolskogen skåra i landslagsdebuten (G16) mot Island 1. august, og var nær skåring i A-lagsdebuten mot Øystese 3. september i fjor (Os vann 3-0).

I år har den tidlegare spissen spelt midtstoppar for både Os og Norge, men i dagens midtbanerolle borte mot Brann 2 blei det ei matchvinnande skåring på den talentfulle yngstemannen på laget.

– Dette var gøy for Ole Martin og både kjekt og viktig for oss. Det var dessutan ei ganske spektakulær skåring, der han, etter litt rot i boks etter corner, saksesparkar ballen i nota, fortel assistenttrenar og kampleiar Ørjan Håland.

Brann 2 - Os 0-1 (0-0)
Målskårar, Os: Ole Martin Lekven Kolskogen (60.)
Os: Thomas Hille - Endre Brenne, Divaldo Cardoso, Aleksander Dale, Torkel Hjertnes - Hassan El Fakiri, Ole Martin Lekven Kolskogen (Rafael Villén 80.) - Marius Mikkelsen, Erik Kanestrøm (Alexander Tøssebro 84.) - Øystein Takle Eide, Christoffer Hafsås (Torgeir Lunde 88.).
Gule kort: Marius Mikkelsen (50.), Ole Martin Kolskogen (75.) og Endre Brenne (90.).

Christoffer Hafsås hadde den målgjevande pasninga til Kolskogen.

Skåringa til Kolskogen var verdt tre poeng, poeng som kan bli avgjerande i den spennande innspurten på årets sesong.

Os hadde fire tap på rad før dagens siger.

– Enorm innsats

Håland skildrar kampen som sjansefattig, med eit par skot frå rundt 20 meter av Brann 2, og med ein situasjon som kunne vore dømt straffe til Os.

– Det er ikkje noko å snakka så mykje om no etter kamp, når vi har vunne, men Hafsås hadde dribla seg forbi forsvaret og skulle til å skyta, men der låg ein forsvarsspelar i bakken, og ballen trilla over handa hans. Hadde Hafsås skote kunne han risikert å treffa både handa og hovudet.

Meir driv på midtbanen

Os hadde i dag lagt litt om, med Mikkelsen som høgrekant, Kolskogen som sentral midtbane og Takle Eide som spiss nummer to.

– Vi har vore flinke til å koma til inlegg i dei siste kampane, og ville ha styrken til Mikkelsen lengre oppe i banen, forklarer spelande hovudtrenar Hassan el Fakiri.

– Det blei ikkje så mange innlegg å slåst om i boks på i dag, men med auka frekvens på midtbanen, i form av raske og unge Kolskogen, og med Takle Eide som ein ekstra spiss, fekk vi ekstra fart i sentrallinja.

– I dag vinn vi på ein enorm innsats. Alle spelarane jobbar knallhardt for kvarandre, frå start. Ein av dei eg verkeleg er imponert over i dag er Øystein Takle Eide, som med høg fart og stor arbeidsvilje sikkert la bak seg fleire kilometer.

Klatra på tabellen

Os låg på 10. plass med 25 poeng, rett over streken, før dagens siger over Brann 2 på 7. plass. No er Os a-poeng med Spjelkavik på 8 plass.

Os speler neste kamp heime mot Herd førstkomande laurdag (kl 15.00)

Terminliste og tabell