Køyrde for tett, fekk 6650 kroner i bot

Politiet patruljerte måndag kveld i sivil bil i Hagavik og på Byvegen.

Klokka 19 stoppa dei ein MC-førar i 20-åra etter snittfartmåling. Han blei målt til 70 km/t i ei 50-sone og fekk forelegg på 5.350 kroner og 3 prikkar på førarkortet.

I 21.30-tida følgde politiet ein MC-førar på E39 Byvegen. Dei observerte denne over tid og stoppa MC-en rett nord for Søfteland.

– Han køyrde for tett på køyretøyet framfor, og fekk 6.650 kroner i forelegg og tre prikkar på førarkortet, fortel politioverbetjent Audun Hadler-Olsen.

Førar, også han i 20-åra, vedtok forelegget.

Oljesøl og påkøyrd hjort

Klokka 21.30 måndag kveld fekk politiet melding om oljesøl på Osbrua. Dette blei rydda vekk, men det er skilta «glatt vegbane» også i dag.

Tysdag morgon, klokka 07.40, kom det melding om påkøyrd hjort på Byvegen ved Tøsdalsskiftet. Ingen personar blei skadd og hjorten sprang frå staden.