Lei for dårleg varsling

Midtsiden skreiv måndag om frustrerte bilistar som møtte stengt veg mellom Os og Samnanger grunna reparasjonsarbeid på Rolvsvåg bru.

– Det blei ein times venting for trafikken på fylkesvegen mellom Samnanger og Os.

– Vi seier oss lei for at skilting og arbeidsvarsling ikkje var god nok den stunda arbeidet pågjekk og vegen var stengt, seier Gunnar Djuve, leiar for bruvedlikehaldsgruppa i Statens Vegvesen Hordaland.

Monterte reserve-bru

Den fire meter lange Rolvsvågbrua fekk skade etter at fyllmasse kring stålrøyret lak ut under flaum i bekken. Det oppsto holrom under asfaltdekket etter ein del tungtrafikk på strekninga.

Som ei mellombels løysing har vegvesenet nytta av reservebru-materiellet og montert ei ni meter lang stålbru i to delar.

Etter at brua var montert blei det lagt nytt asfaltdekke før trafikken slapp på igjen.