Levande musikkmiljø på ny utestad
Bildeserie, bli med inn på nye XS Lounge: Langfredag fekk Os ein ny utestad og livescene, laurdag husar dei sin første konsert.
Bildeserie:
I påsken opna ein ny utestad i Telthuskvartalet i Os sentrum. Thomas Lunder sitt selskap Norway Promotions AS driv utestaden, som har fått namnet XS Lounge.
Barsjef Kenneth Carlson er frå Bergen, men bur no i Os. Han fortel om ein fin start.
– Lokalet var veldig bra, drivarane av førre utestad har tydelegvis pussa opp ein del før dei la ned.
– Vi ønskjer å skapa eit godt miljø for musikarar og bygde ny scene. Vi fekk også inn nokre nye møblar før opning.
Trass namnet, som dei fleste tolkar som «Extra Small Lounge», er det ei grei mengde komfortable sitjeplassar rundt dansegolv og scene.
Jam kvar fredag
Med 60-70 gjestar dei første fredagane er XS-drivarane nøgd.
– Det er tydeleg at det er eit rikt musikkmiljø i Os, og eit fint publikum. Laurdagane har også vore greie besøkstal, med folk frå 20 til 60 år som kjem innom.
– Med Bar(t), Solsiden, Catten og oss har osingane fått seg ei lita løype så dei kan gå pub til pub om dei vil.
XS kjører jam kvar fredag, men vil også ha livemusikk enkelte laurdagar.
Første band ut: Bodeen
XS Lounge sin nye livescene har også blitt lagt merke til utanom Osbygda.
– Det bergensbaserte bandet Bodeen viste interesse for å spela hos oss og i morgon går dei på scenen.
Bodeen er eit relativt nystarta band som består av rutinerte musikarar med lang fartstid. Bandet speler både eige materiale og coverlåtar, i hovudsak blues, men leikar seg også med sjangrar som rock, soul og jazz.
Bodeen består av: Cecilie Carina Bodin (vokal), Kjell Ivar Haugan (gitar), Kristian Roset (bass) og Jordan Saratonev (trommer).
XS Lounge har normalt fri entre fredag og laurdag, også på jam, men når det er laurdagskonsert er det billettsal i døra. Utestaden har 20 år som aldersgrense.
Spennande? Vil du ha ukas høgdepunkt i innboksen?
Les meir om
Last ned Midtsiden-appen idag
No kan du følgja nyhende frå Os - rett i appen.
- Gratis å lasta ned
- Bli varsla straks noko skjer
- Tilgjengeleg i App Store og Google Play Store
For å få tilgang til alle sakene i appen må du vera abonnent.