Markerte FN-dagen

Bildeserie:

1 av 9

24. oktober er den store FN-dagen, og fleire skular og barnehagar i kommunen plar årleg markera denne.

Skulen på Søfteland er no utan ungdomskuleelevar og fredag var første gong alle elevane på barnetrinnet var samla i gymsalen på skulen som rein barneskule.

– Vi har jobba intenst dei siste vekene for å få dette klart, fortel undervisingsinspektør Torgeir Skjælaaen.

I tillegg til framsyning i gymsalen arrangerte skulen motbakkeløp og kafé der inntekta gjekk til Unicef.

– I dag slår vi på stortromma, og målet vårt er at dette skal bli ein fast tradisjon på skulen.

Song og «FN-røris»

Elevane på skulen hadde førebudd seg godt og på scena blei det både song, dikt og opplesing av born sine rettigheitar.

Rektor Line Marie Aarbakke opna arrangementet der ho fortalde om FN-dagen og kvifor vi feirar den.

– Det er viktig å markera dagen for alle dei som ikkje har det like godt som oss, sa ho.

3. klasse fekk salen med på "FN-røris" der alle måtte bli med og bevege seg til musikken.

Søfteland har og velkomstklassen i Os, der elevar som ikkje kan norsk går til dei er klare å starta på skulen i sin eigen krins.

Dei framførte fire songar, tre av dei på norsk.

Til avslutning i gymsalen var heile skulen med og dansa BlimE dansen før dei gjorde seg klare til motbakkeløpet.

Løpet gjekk opp Gjessadalen og konkurranseinstinktet var på topp blant elevane medan publikum heia på sidelinja.

Godt oppmøte på kafé

Klokka 13.00 opna kafeen og utanfor stod foreldre, besteforeldre og andre klare til å koma inn.

– Då vi opna dørene blei vi positivt overraska over det store oppmøtet, fortel Aarbakke.

I kafeen fekk dei frammøtte kjøpa kaffi, kaker, saft og te og nesten 6000 kroner blei samla inn til Unicef sitt arbeid.

– I tillegg har vi to elevar som har selt armband dei hadde laga sjølv.

Dei to jentene frå 3. klasse fekk inn 100 kroner som dei hadde med seg på skulen.