Matchvinnar Moldskred

På tampen av sommarferien i fjor gjekk Mats Cato Moldskred frå Os i 3. divisjon til Kongsvinger i håp om å hjelpa til med opprykk til OBOS-ligaen.

Kongsvinger blei verande i 2. divisjon, men har fått ein svært god start på sesongen.

– Vi var ikkje gode nok i fjor, men no er vi det. Stallen er styrka og dei to portugisarane som trener oss har ein litt spesiell stil, men den fungerer, seier Mats Cato.

God i NM - suveren i serien

KIL står med siger i 6 av dei 6 første seriekampane (med 17-2 i målforskjell) og toppar tabellen med 7 poeng bak til andreplassen.

Dei har også vunne dei to første rundane i NM. Neste helg tar dei imot Tippeligalaget Sandefjord til ny cupkamp.

Osing i storform

Mats Cato har skåra 5 mål i serien og 3 i NM.

– Eg speler spiss no, og det har gått bra både med meg og med resten av laget, seier Moldskred.

Han har spelt frå start i 7 kampar og allereie skåra 8 mål, ingen av dei på frispark eller straffe.

I første NM-runde skåra han to mål og blei matchvinnar (KIL vann 3-1). Les meir og sjå video på glomdalen.no.

– Det er god stemning i Kongsvinger, både på banen og tribunen, med godt publikum og mange som bryr seg, seier osingen, som jobbar frivillig som hospitant på ein brannstasjon og held på å ta lastebilsertifikat ved sidan av livet på banen.