Kirsten Bråten Berg - lydprøve i Os 2017

– Musikk og mat er god integrering

Sjå bildeserie frå Kirsten Bråten Berg sin konsert under syrisk dag på torget i Os.

image
image
image
image
image
image
image
Av: Kjetil Vasby Bruarøy

VIDEO: Kirsten song a cappella under opninga, i det som i grunnen var ein lydprøve. (Foto: Vidar Langeland)

Laurdag var folkemusiker Kirsten Bråten Berg i Os for å synga under syrisk dag ved restauranten Havnechefen. Bakgrunnen for at den prisvinnande folkemusikaren var i Os, er at ho er personleg ven av kokken, Ghader Diab, som var både gjest og arbeidar på garden til Berg-familien etter flukten frå Syria og ankomst til Noreg.

– Vi fekk knapt øva saman, men med så flinke musikarar som det er i Os så gjekk det kjempefint. Det var ei fantastisk stemning i Os sentrum og eit strålande vêr! seier Kirsten til Midtsiden.

Ho fekk òg ein lang samtale med gitaristen i bandet, også han frå Syria.

– Det er kjekt å sjå korleis musikken blir ein del av integreringa, og for Ghader sin del, maten. Han hadde laga ein kjempestor buffet, og dagleg leiar ved restauranten hadde byrja å lura på kva dei skulle gjera med all maten på søndag, men alt forsvann.

– Sjølv gjekk vi mette heile helga, frå fredag til søndag, men vi fekk oss ein frisk dukkert i sjøen både morgon og kveld. Søndag fekk vi òg ein fin tur til Lysøen.

Kva kan nordmenn synga saman?

I neste veke er Bråten Berg blant mottakarane av Anders Jahres kulturpris 2017. Den årlege prisen er «en hederbevisning for utmerket arbeid, først og fremst for norsk kulturliv».

Helge Jordal var blant mottakarane i fjor.

– Når eg mottar prisen så vil eg seia nokre ord om kva folkemusikken betyr for innvandrarane våre, eg har sett fleire tilfelle av korleis det fører folk saman, blant anna ein musikar frå Afrika som har budd her i 20 år og byrja å spela saman med ein som nyleg kom her frå same land. Den eine fekk den andre integrert.

– I utlandet er det mange som er flinkare enn oss i Noreg å ta vare på folkemusikken. Det fekk eg sjølv oppleva då vi var ei gruppe på sykkelferie i Europa. På kvelden skulle vi synga litt saman, men det var ikkje mange norske låter vi var saman om å kunna teksten på.

God integrering

Besøket i Os blei uansett svært vellykka for Kirsten og mannen Bjørgulv.

– Det var utruleg kjekt både å sjå Ghader igjen og å sjå at han har det så bra. Vi snakkar med fleire av desse som kom frå Syria og var innom den vesle bygda vår før dei fôr vidare. Nokre av dei sit mykje åleine.

– Ghader har ikkje berre fått seg jobb, dei som er rundt han tar han med på alt mogleg, han har fått eit nettverk av venar. Tenk om vi var fleire i Noreg som tok imot dei nye på denne måten, som var opne og gjestfrie og viste dei nye litt av vår eigen kultur.