Når bossdagen blir ekstra lang

Har du eit stykke å gå med spannet ditt når det er tømmedag for bosset? Då veit du sikkert at det kan vera praktisk å hekta det på hengarfestet på bilen til og frå husveggen.

Trass romlelyden du skulle tru at spannet lager, hender det likevel at enkelte av og til gløymer å hekta det av, og tar bosspannet med på tur.

– Eg veit ikkje kor langt vedkomande har køyrd med dette spannet, eg oppdaga det ikkje før eg nærma meg Uno X, Flaterås og rundkøyringa ved Industrivegen, fortel ein Midtsiden-lesar.

Det var litt før klokka 15.30 i dag at han la merke til den noko komiske langtransporten framfor seg.

– Det såg ut som om nokon køyrde opp på sida av bilen og gav beskjed. Eg køyrde til høgre i rundkøyringa, mot Halhjem, denne bilen køyrde til venstre, anten mot Os eller kanskje tilbake der vedkomande kom frå.

– På veg til Bir sin gjenbruksstasjon var bilføraren i alle fall ikkje.