To NM-gull og to noregsrekordar

– Dette er ikkje min beste prestasjon, eg har sumt betre enn eg gjorde i NM.

– Men det er mine beste resultat, seier Ariel Braathen frå Søfteland, som før helga debuterte i senior-NM.

To gull og norske rekordar

Ariel er del av Bergen SC-laget som tok NM-gull i stafett i både 4 x 50 meter fri og 4 x 100 meter fri.

I tillegg blei det ny norsk rekord på begge distansane.

– Vi låg også an til siger på 4 x 50 meter medley, men eg var for tidleg uti på min distanse, så vi blei diskvalifisert for tjuvstart.

Ho deltok også i fire individuelle øvingar, men der nådde ho ikkje opp.

– Eg held på å jobba inn ny teknikk på brystsymjing. Eg hadde litt høg frekvens på symjetaka, no jobbar eg med ein rytme som passar styrken min betre.

10-12 treningsøkter i veka

Havfrua frå Os har tidlegare sagt at OL i Rio i 2016 er hennar største mål. Og ho jobbar hardt for å bli best.

– Vekkerklokka mi ringer klokka 04.45, men eg står ikkje opp før 04.55, innrømmer ho.

Seks dagar i veka går turen til morgontrening i Bergen, og ho må tidleg opp for å vera tilbake til Søfteland til det ringer inn.

Etter skuletid går turen til Bergen igjen for økt nummer to. Berre søndag er treningsfri.

Langbane neste

Ariel er saman med storebror Sebastian og tidlegare lagkamerat Tom Andree Moberg Johansen stortalent dyrka fram av Os Svømmeklubb i Osbadet.

No trener Tom Andree med Delfana og søsknene Braathen med Bergen SC.

Neste mål for Ariel, som fyller 15 år i mai, er NM i langbane til sommaren.

Les òg:
• Fire gull og to sølv
• Klarte NM-kravet