Like etter stengetid laurdag kveld vart Drageset Super Spar i Industrivegen brutalt rana. Gjerningsmannen, som var væpna, tapet dei tre tilsette fast før han stakk av på motorsykkel.
Tekst og foto Kjetil Vasby Bruarøy
(26.07.2004)
Ingen er pågripen etter ranet laurdag kveld, og Os lensmannskontor ber publikum om hjelp.
- Vi ønsker å få kontakt med alle som var å handla i butikken den siste halvtimen før stengetid. Vi har nokre namn på blokka allereie, men det er fint om dei kan ringa lensmannskontoret og melda seg, seier politibetjent Kenneth Rastad ved Os lensmannskontor til bt.no.
Rundt klokka 20.10 skal ranaren ha slått til. Tre tilsette vart trua av den maskerte og væpna mannen, og tapet fast, før han tømte kassane og stakk av på ein svart, truleg japansk, motorsykkel.
Mannen var rundt 1,80, og politiet arbeider ut frå teorien om at han har gøymt seg i butikken før han slo til.
- Vi har fått inn ein del interessante observasjoner, men vi vil gjerne ha fleire, seier Rastad.
Ingen av dei tilsette vart skadd under ranet. Administrerende direktør i Superspar-kjeden, Dag Eide, seier at dei tre har fått tilbod om hjelp, og at dei etter tilhøva har det bra.
