Tar 700 på skiskule

I fjor på denne tida lokka MX Sport si skimesse så mange til Voss Fjellandsby at dei måtte setja opp skilt i Voss sentrum for å seia frå at det var fullt ved alpinanlegget.

I år er kapasiteten i Myrkdalen dobla, med blant anna ny 6-seters ekspressheis. Fleire skiinstruktørar er også på plass, og det kjem godt med.

- I fjor hadde vi 400 på gratis skiskule, onsdag passerte vi 600 påmeldingar til årets messe, fortel Jan Frode.

Og det er ikkje berre ungar som skal læra å ploga blant det som truleg b lir nærmare 700 kursdeltakarar. Ungdom og vaksne har meldt seg på både carvingkurs og undervising i snøbrett, telemark og frikjøring.

- Dei som driv skiskulen ved anlegget trur dei kjem til å setja noregsrekord i skiundervising denne helga. Og dei meiner anlegget fint skal kunna ta unna køane, sjølv om det kjem fleire enn i fjor, seier Skeie.

Nytt under årets messe, som finn stad til helga, er skirenn for dei yngste og smørekurs med tidlegare landslagssmørar.