Ei engasjert mor som tok kontakt med Os Turn for å arrangera innandørsaktivitet for dei yngste fekk raskt hallstyrarane med på ideen.

- Saman med handballgruppa kjem vi til å arrangera open idrettshall omtrent kvar helg framover, seier leiar i fotballgruppa, Bjarte Wiberg.

To timar kvar laurdag, bortsett frå til helga, då sundagen skal brukast, skal setjast av til ungar med foreldre.

- Tanken er å ta ut mykje utstyr og la ungane få leika og utfalda seg meir eller mindre fritt. Generelt sett sit ungar og vaksne meir i ro enn før, så då ser vi det naturleg å kunna tilby aktivitet innandørs for flest mogleg.

- Vi kjem til å ha det ganske fritt, men dela inn hallen, ha aktivitetsleiarar, og i samarbeid med foreldra forma dette til eit fritt, men trygt aktivitetstilbod, seier Wiberg.