Notabene blir ARK

Tysdag ettermiddag blei det kjend at ARK tek over bokhandelen på AMFI Os.

– For oss i kjeda har det vore kjend at det har vore jobba med ei stund, men det var først rundt pinsetider vi fekk veta at butikken på Os var ein av butikkane ARK kjøper, fortel butikksjef Anne-Christin Aasen.

Får ein sterk eigar

Skiftet frå Notabene til ARK skjer torsdag morgon. Aasen er glad for at det er Noregs største bokhandlarkjede som no tek over.

– Vi er veldig glade for at det er ein sterk eigar som kjem inn. For oss i butikken gjer det at vi kan føle oss enno tryggare på jobbane våre.

– Alle er veldig positive til å koma inn i den nye kjeda, som vi har hørt veldig mykje positivt om, seier Aasen.

Det vil nok framleis ei stund vera noko Notabene preg over butikken, men det skal vera av dei prioriterte til å bli omprofilert.

Veldig glad

Senterleiar for AMFI Os Silje Lygre delar gleda med dei tilsette i butikken.

– Det er veldig gledeleg. For AMFI Os er det veldig kjekt å få ei så solid bokhandlarkjede i senteret. ARK kan visa til ei veldig god utvikling dei siste åra.

– For senteret er det òg viktig å ha ein god miks av butikkar. Ein bokhandel er ein naturleg del av den miksen, avsluttar Lygre.