Oddvin Bøthun heldt tale då IL Øyglimt sine 40 første år blei feira. (Foto: IL Øyglimt)

Oddvin ramsa opp: 40 år med IL Øyglimt

Starten, supporterane og den rekordlange sigersrekka.

image
image
image
image
Av: Kjetil Vasby Bruarøy

I 1977, to år før det kom bru, ny skule og tilhøyrande 45 x 90 meter lang grusbane (kunstgras frå 2011) http://www.midtsiden.no/anlegget-blei-opna blei idrettslaget Øyglimt starta. Primus motor Morten Nordahl-Pedersen, som i 2015 brått gjekk bort, var både spelar, trenar og starta seinare ei turngruppe.

Fredag kveld blei gamle og nye heltar hylla, då blei 40-årsdagen feira og på beste vis oppsummert av talar Oddvin Bøthun.

– Eg var ikkje med og spelte første kamp, men eg såg på, fortel Oddvin, som fyller 54 år i desember.

Det var han ikkje åleine om. Det hendte at supportarar reiste samla med buss, eller båt, til Øyglimt sine kampar. Standard supportarutstyr var ein kasse øl. I første seriekamp, som gjekk mot Fusa-klubben IL Nordly, måtte dommaren blåsa av kampen fleire gongar grunna publikum som spaserte over banen.

– Folk reiste innover i fleire båtar. Om nokon skulle over frå den eine langsida til publikum på den andre, så var det visst ikkje snakk om å gå rundt, seier Oddvin.

Starta på Kuventræ

Øyglimt hadde grusen på Kuventræ som heimebane før dei i 1979 fekk ein eigen bane, ein knapp bane til å vera 11-arlag.

– Vi hadde ikkje skikkeleg utstyr til å måla opp banen med heller. Viss det var Øyvind Strønen (ikkje den lågaste mannen i Øyane) som hadde skritta opp banen, så hendte det at 16-meteren var utanfor sidelinja. Det kunne skapa forvirring, ikkje minst då det skulle takast hjørnespark.

I ein periode på 80-talet brukte dei Lysekloster sin kunstgrasbane.

Treningsleirar blei det òg. I 1981 var laget til Danmark, og spelarane hadde kjærastane med seg.

– Det blei ein kjemfin tur, treningsleiren var så vellykka at året etter blei det fødd nesten mange nok ungar i Øyane til eit heilt nytt lag, fortel Bøthun, som har lang fartstid i revygruppa Nor og ne.

Nedrykk etter hårfint tap

På sitt beste spelte Øyglimt sitt herrelag (vi snakkar framleis 11-arfotball) i det som tilsvarar dagens 5. divisjon. Idrettslaget hadde også damelag ein periode midt på 80-talet, og ein periode var det både A- og B-lag på herresida.

– Det var kjøpelaget og fiskarane. Fleire innanfrå land spelte her ute, som tre blad Strønen og fire blad Pettersen. Rolf Olsen er den som har flest sesongar, han spelte frå 1980 til det var slutt for seniorfotballen, rundt 25 år. Asbjørn Pettersen kom eit par år etter og heldt òg ut til slutt.

Slutten for 11-arfotball kom i 1993.

– Vi avslutta med avgjerande nedrykkskamp i 7. divisjon borte mot Samnanger, i mykje regn og høgt gras, der berre to av oss hadde knottar under skoa. Vi tapte hårfint 18-0, minnast Bøthun.

Rekordlang sigersrekkje

Året etter opna det for 7-arfotball i 8. divisjon. Øyglimt var i sitt ess, kom i finalen i 9 av 10 år, og blei kretsmeister sju år på rad (senior, ikkje oldboys, men med snittalder godt over 40 år).

Bjarte Kvåle (fødd i 1970), som var yngstemann på A-laget då han kom med som 16-åring, var yngstemann då 7-arlaget gav seg ein gong tidleg på 2000-talet. (Blei kretmeister i 2002, ifølgje Midtsiden sitt arkiv).

Øyglimt spelte dobbeltfinale mot Flaktveit i 2002. Heimekampen enda med 2-1-siger, borte blei det 3-3, og ei rekordrekke på 38 sigrar på rad blei broten.

- Vi vann 38 kamper på rad, og slo den gamle rekorden til Knarvik med 32 sigrar, sa spelande trenar Hans Otto Bruarøy då Øyglimt i 2002 runda av sesongen med 39 kampar på rad utan tap.

Hans Otto, som har vore trenar i fleire omgangar, og formann i over halve levetida til Øyglimt, fekk spretta kaka saman med Mona Nordahl-Pedersen. Ho blei takka for å i si tid ha lokka eldsjela Morten til Øyane.

Frå Øyglimt til landslaget

Øyglimt har i periodar hatt junior- og gute- og jentelag (16 år).

– Eg blei aldri så god spelar, men spelte litt ute og sto ein del i mål. Men eg trente eit jentelag som blei veldig gode. Dei starta heilt på null, året etter hamna dei på 2. plass etter eitt tap og ein uavgjort, med flest skåra mål og med ein stall der alle på laget hadde skåra mål i løpet av sesongen, fortel Oddvin.

Fleire talentfulle spelarar har starta karriera si på den vesle banen på Sundøy. Den som kom lengst var Bjørn Dahl (fødd i 1978), som fekk 171 kampar med Viking, vann seriegull med Brann, rykte opp med Hønefoss og fekk éin kamp med landslaget.

– I dag har Øyglimt 10 fotballag i aldersbestemt, og vi har handball i idrettslaget. Vi har fleire unge heltar som veks opp, ikkje minst Tommy Aasen, som står bak Redd Barna Cup.

Tommy kom opp på scenen og fekk solid applaus. Redd Barna Cup har til saman samla inn over 250.000 kroner til hjelpeorganisasjonen, og Øyglimt blir neste år eitt av få lag i Noreg som får spela med Redd Barna-logoen på brystet.

Sponsorane Inka, Samba, Dales Rederi og Brødrene Borgen fleskar òg til, og kjem med nye drakter til alle laga til neste sesong.

– Det blei ein flott fest for 40-åringen, synest Oddvin.