Sport | 02. jan. 2017

Os Kickboxingklubb legg ned

Etter siste gradering i juni, og ei ganske grei medlemsmengde i haust, er det no slutt for den 20 år gamle klubben.

Os Kickboxingklubb legg ned
Denne gjengen fekk nytt belte til sommaren 2016. Det blei siste gradering i Os Kickboxingklubb. (Privat foto)
Kjetil Vasby Bruarøy
Kjetil Vasby Bruarøymandag 02. jan. 2017 21:24

Os Kickboxingklubb, som blei etablert midt på 90-talet, er frå januar 2017 lagt ned.

– Medlemmane har fått beskjed og vi har meldt det inn til forbundet, seier formann Thomas Jensen.

– Klubben blei starta som ei avdeling av Bergen Kickboxingklubb, eg trur det var i 1996 på treningssenteret Cha-Zet, og blei eit år eller to seinare registrert som eigen klubb.

For få eldre medlemmar

Jensen seier årsaka til at klubben blir lagt ned verken er rekruttering eller medlemsmengde.

– Vi har vore ein god gjeng på 15-20 på trening i haust, men vi har dessverre hatt for stort fråfall av ingdomar dei siste åra. Vi blir for få instruktørar.

Medlemsmassen består i dag av nesten berre 12- til 14-åringar mens Thomas, broren Christer og Vidar Kaastad er einaste instruktørar.

– Vi er glade for den gode rekrutteringa av unge, seinast før sommaren i fjor planla vi å starta eige barneparti. Men då ungdomane som skulle bli instruktørar ville gje seg så la vi planane på is. Når ungdomen prioriterer skule, reiser vekk eller skal i militæret så blir vi litt for få igjen, i tillegg til at vi ikkje å bygga den klubben vi ønskjer.

Gode år og gode utøvarar

Både verdsmeister frå 2009 Eirin Dale og europameister frå 2010 Ina Grindheim frå Os hadde sine første år i den lokale klubben.

– Vi har hatt mange gode utøvarar og mange gode år, for eksempel frå 2004 til 2006, og i 2010 og 2011, der vi òg hadde fleire aktive konkurranseutøvarar og var meir spreidd i alder.

Kan få hjelp frå Fana og Bergen

Dei avtroppande instruktørane har vore i dialog med kickboxingklubbane i Fana og Bergen, og understreker at medlemmane frå Os er velkomne andre stadar.

– For Bergen sin del kan det, om interessa blir stor, bli aktuelt å starta avdeling på Os. Men då må det nok fleire lokale eldsjeler på banen.

Graderinga i juni i fjor blei den siste i Os Kickboxingklubb, som ikkje har fornya leigekontrakten hos Sprek og Blid Os.

– Vi har hatt nokre fine år hos Sprek og Blid, og saman med alle som har vore medlem desse åra. Vi ønskjer alle lykke til vidare, seier Thomas Jensen.

Spennande? Vil du ha ukas høgdepunkt i innboksen?

Les meir om

Tilbod: 1 månad for 1 kr

No kan du lesa Midtsiden.no i 1 månad for kun 1 kr.

  • Tilgang til alt innhald
  • Utan bindingstid
  • Frå 145 kr/md.
Les meir og bestill

Abonnementet blir fornya kvar månad. Du kan seia opp kor tid du vil, og blir då ikkje belasta for neste periode.