- Os må skåra 4

Oppman Rasmus Storebø fortel om sjuk keeper og skadd matchvinnar, men trur på minst to Austevoll-mål i morgon.

Kjetil Vasby Bruarøyfredag 30. okt. 2009 13:46

Rasmus Storebø er formann i Austevoll Fotball og oppmann for A-laget. Han er også som eit vandande leksikon når det gjeld laget som kjem til Os i morgon, og fortel både om status i troppen og interessante historiske fakta.

- Kristian Møgster fekk hjerneskaking i duellen med Anders Glesnes i slutten av den førre kampen, og har truleg speleforbod i morgon, seier Storebø.

Kristian snappa ballen Glesnes heada tilbake til keeper før slutt, og putta 2-1-målet. Men i neste duell fekk han Os-backen sin olboge i hovudet (bildet).

- Han er litt hissig, Glesnes, som hadde halve Austevoll-slekta si på tribunen under kampen. På legevakta spurte legen om Kristian hadde vore i duell med Os sin høgreback, så det er tydelegvis fleire som kjenner til temperamentet, seier Rasmus med eit smil.

Sjuk keeper
Austevoll-keeper Daniel Aga er sjuk. Han er truleg smitta av svineinfluensa og må nok stå over den avgjerande kampen på Kuventræ laurdag.

- Men Harald Østervold er heime frå fiske, og han har stått godt i åtte kampar i år. Han kom inn i vår då Daniel var sjuk, og sto så godt at han starta i dei neste seks kampane.

- Os treng 4 mål for å vinna
Storebø trur på minst to Austevoll-mål i morgon, slår det til må Os putta fire for å vinna samanlagt.

- Trond Heggestad skåra ikkje i førre kamp, og eg trur ikkje det har skjedd at han har spelt to kampar på rad utan å skåra. Så han kjem garantert til å skåra minst eitt, trur oppmannen.

Heggestad skåra 17 mål på dei 8 kampane han spelte i vår, og 11 mål på dei 6 siste. Til saman 28 mål på 14 kampar.

Skaut Os ned i 3. divisjon
6 av spelarane som fekk Austevoll opp i 3. divisjon for 11 år sidan spelar framleis, og 5 av dei kjem til å spela frå start i morgon. Ein av dei er Stig Storebø.

- Stig skåra hattrick i sesongopninga mot Os for Løv-Ham i 1996. Hadde han skåra to færre så hadde Os heldt seg i 2. divisjon, i staden måtte dei for første gong sidan 70-talet, trur eg, ta turen ned i 3. divisjon.

God 91-årgang
Også ungdomane på Austevoll-laget skal ha vore med på spennande sluttspel før.

- Første gong 91-årgangen vår var med på sluttspel var då dei vann Nordhordlandscup. Då spelte dei finale mot Os, i 5-arfotball, som dei vann 10-0, seier Rasmus Storebø.

Os har fleire gode 90- og 92-spelarar, men einaste i A-stallen frå 91-årgangen er Vegard Leikvoll Moberg.