Os Sp kåra til årets lokallag

Det var under årsmøtet i Hordaland Sp i Ullensvang 10. og 11. februar den gjeve kåringa fann stad.

I grunngjevinga heiter det at Os Sp gjorde eit godt val i 2015 i "Frp-land", driv aktiv møteverksemd og har aukande medlemstal.

Leiar i Os Sp, Eivind Moberg, tok i mot utmerkinga som var eit diplom, ein pengepremie og blomar.

– Utmerkinga kom heilt uventa. Eg må få dela æra med resten av styret, som arbeider særs godt ilag, seier Moberg til Midtsiden.

Makt nær folket

Moberg fortel om eit godt årsmøte kor stortingsrepresentant Kjersti Toppe og fylkestingsrepresentant og tidlegare leiar i bondelaget Nils T. Bjørke vart vald til toppkandidatar til stortingsvalet.

– Fylkesleiar Jostein Ljones, Nils T. Bjørke, Kjersti Toppe og nestleiar i Senterpartiet Anne Beate Tvinnereim var mellom dei som heldt gode innlegg i debattane.

– Lensmann i Hardanger, Terje Kvalvik, orienterte om ny organisering av polititenesta i Hordaland generelt og Hardanger spesielt i samband med den nye "nær"-politireforma.

– Vi er i sterk framgang og vil halde fram med å arbeida for desentraliserte tenester og makt nær folk i hele landet, slår Moberg fast.