Os vann igjen

Søndag tok Os imot NBK/Eikanger/Kvernbit til sesongens nest siste heimekamp. Os vann 4-1 borte i vår, men starta dagens kamp med 0-1 i første speleminutt.

– Vi fekk god motstand i dag, gjestane hadde ein del veldig raske spelarar, seier Cato Moldskred.

Os - NBK/Eikanger/Kvernbit 2-1 (1-1)
Mål, Os: Malin Moldskred og Kristine Moldskred

Moldskred er med i trenarteamet og leia damelaget i hovudtrenar Rune Balland sitt fråvær.

– Jentene var heldigvis veldig arbeidsvillige i dag. I tillegg til å vera trygge bak vann vi spelet på midtbanen og skapte rikeleg med sjansar.

Utlikning og skade

Os hadde nokre fine gjennomløp utan å putta før Malin Moldskred kom til skot frå spiss vinkel til venstre for motstandarmålet.

I 24. minutt gjekk ballen rett i nota, 1-1.

Men Malin blei sparka i leggen og måtte av banen resten av kampen. Også lagets toppskårar, Linn-Helen Thuen fekk seg ein smell og halta av banen. Men ho kom inn igjen og var ofte trugande framfor motstandarmålet.

Ungjenter avgjorde

Gjestane opna best etter pause, men heimelaget tok meir og meir over. Då den unge midtstopparen Kristine Moberg (16) blei flytta fram blei det endå fleire sjansar og etter nokre forsøk av Moberg og Thuen som hamna utanfor eller blei slått til corner kom endeleg 2-1-skåringa.

Sjølv om Os hadde overtaket på midtbanen og skapte mest var gjestane aldri ufarlege. Flotte redningar av Amalie Lindborg Bøyum (17) sørgja for at Os kunne konsentrera seg om det offensive spelet.

– Amalie har vore god i heile haust og var nok ein gong viktig for oss, seier trenaren.

Ei anna ungjente som imponerte var Mathile Helland Lassen (15). Mathilde kom innpå i forsvar og såg ut til å vera eit av lagets aller raskaste spelarar. I tillegg var ho knalltøff i duellane.

– Kristine skapte mykje i angrep og Mathilde gjorde nok sin beste kamp til no, skryt Cato Moldskred.

Os sitt lag: Amalie Lindborg Bøyum - Kine Lunde, Katrine Helland, Kristine Moberg, Heidi Kloven - Malin Moldskred, Nina Haugland, Anette Holmefjord, Monica Nordeide - Linn-Helen Thuen og Caroline H. Nilsen.

Innbytarar med speletid: May Helen Johnsen, Mathilde Helland Lassen, Synne Hellevang Berg og Therese Hjelle (keeper).

Os ligg på 3. plass på tabellen og har no to kampar igjen, borte mot Rosendal på 4. plass og heime mot serieleiar Fyllingen søndag 23. oktober kl 16.

Tabell, kvinner 4. div avd 1 høst