Sånn såg det ut etter at ein bil køyrde inn i ein naustvegg på Tøsdal søndag kveld. (Lesarbilde, tips@midtsiden.no)

Øvelseskøyring enda i naustvegg

Ingen blei skadd då bil hamna i eit naust på glatten søndag kveld.

Av: Kjetil Vasby Bruarøy

– Det var ingen folk ved bilen, og så vidt eg veit er det ingen av dei som bur i området som har ein sånn bil, fortel ein Midtsiden-lesar som søndag kveld sendte bilde til redaksjonen.

Politiet hadde heller ikkje høyrd om uhellet på Tøsdal, men det har nausteigar.

– Dei ringte meg sjølv og fortalte om skaden på naustet, seier eigar Torbjørn Tøsdal.

Store skadar

Bilførar forklarte at uhellet hadde skjedd under øvelseskøyring. Det var glatt i området då bilen segla inn i naustet og knuste den eine veggen.

Bilen har fått skadd hjulstilling og blei ståande igjen. Ingen personar skal ha blitt skadd.

– Også naustet har fått ganske store skadar. Grunnmuren er pressa ein halv meter inn i naustet, så standarane i gavlen heng i lause lufta.

– Heldigvis gjekk langveggen klar, seier Tøsdal, som no er opptatt av å få veggen tett fortast mogleg, for å sikra veden han har lagra i naustet.