Over 200 åttandeklassingar på veg til Borgafjellet

Bildeserie:

1 av 6

I dag går årets Opptur av stabelen. Over 34.000 ungdomar frå 481 skular deltar, noko som er ny rekord.

- Opptur har hatt ein formidabel vekst sidan starten, med 6000 deltakarar i 2006. Fleire stadar står skular på venteliste for å vera med. Denne dagen er viktig for å gje ungdom ein smakebete på gledene ved friluftsliv, i ei tid då mange unge droppar å driva med fysisk aktivitet, seier Nils Øveraas, generalsekretær i DNT.

I Os er det Os Turlag som stiller opp. I går merkte dei løypa, i dag stiller over 15 vaksne medlemmar som vaktar.

– Vi har òg med oss elevar frå ambulanselinja ved Os vidaregåande skule, som er plasserte ute i løypa.

Til Borgafjellet med over 200 elevar

Alle 8. klassingane frå dei to ungdomsskulane i Os, Os og Nore Neset, er inviterte.

Det var 235 påmeldte og er rundt 220 som starta klokka 9 i dag.

Turen går frå Os ungdomsskule opp Borgavegen til Nordmarka, på den nye stien forbi Knutabruo til Tøsdal, opp Tøsdalsskaret, til Borgafjellet (353 moh) og ned igjen til ungdomsskulen.

– Gå på stien, ikkje trø på bakkane på Tøsdal, kom det frå megafonen til turlaget.

Dei raskaste i fjor kom i mål på rett under to timar, dei siste kom i mål etter rundt fire timar.

– Men dette er ikkje ein konkurranse. Enkelte springer det dei har, men det vel dei sjølv. Målet er at dette skal vera ei god turoppleving.

Får 3 spørsmål og 15 premiar

Dei unge turgåarane har fått med seg kvar sine kort til å stempla seg inn på ulike sjekkpunkt.

På enkelte sjekkpunkt får dei òg testa lokalkunnskapen sin.

Her er spørsmåla dei får, kor mange kan DU svaret på?

1. Svinningen er høgaste fjell i Os. Kor høgt er det?
a) 842 moh
b) 642 moh
c) 1042 moh

2. Kva for stad ligg ikkje i Os?
a) Kalandseid
b) Øvredalen
c) Ervikane

3. Kor mange menneske bur det i Os?
a) 21.000 - 25.000
b) 18.000 - 21.000
c) 15.000 - 18.000

Uavhengig av kor rett dei svarer blir det trekt ulike sportye premiar på startnummer.

– Vi har fått sponsa ein del av MX Sport og har både ryggsekk, hodelykt, termos, rumpetaske og drikkeflaske i premie. I tillegg har vi t-skjorte frå DNT som alle får.

Fakta om OPPTUR

• Nasjonal turdag for åttandeklassingar, arrangert av DNT sine medlemsforeiningar.
• Blei arrangert første gong i 2006 med 6000 deltakarar.
• Går i år av stabelen for 11. gong med over 34.000 ungdommer, noko som tilsvarar over halvparten av landets 8. klassingar.
• Heile 481 skuler deltar, noko som er 40 fleire enn i fjor.