På veg mot Bjørnafjorden KrF

Partileiar Knut Arild Hareide besøkte måndag kveld Eikelandsosen. Der var lokallaga til KrF i Samnanger, Fusa og Os inviterte til festmøte.

– Knut Arild Hareide heldt ein politisk tale der han trekte fram pleiepengar og lærarnorm som dei viktigaste sakene KrF fekk gjennomslag for i forhandlingane med regjeringa om budsjettet.

– Dette er viktige saker for KrF og er i samsvar med verdiane til partiet, seier gruppeleiar i kommunestyret for Os KrF, Jakob Enerhaug.

Skal bli eitt frå 31. mai

Det var eit stort engasjement med mange spørsmål og kommentarar frå salen. Knut Arild Hareide fekk med seg gode innspel og oppmuntringar frå partifellene i Bjørnafjord-regionen.

Etter festmøtet hadde Fusa KrF og Os KrF sine respektive årsmøte. Der vart prosessen med å skulla etablera eit nytt Bjørnafjorden KrF, og avvikla dei gamle partilaga, vedtatt.

Etter planen skal dette skje 31. mai i år.