Par redda seg ut av hus i brann

Klokka 03.39 natt til fredag rykte Os brannvesen ut på ein bustadbrann i Hegglandsdalen.

– Heile huset var fylt med røyk då vi kom fram. Det vaksne ekteparet som bur i huset hadde kome seg ut, fortel brannsjef Stein Gjøsund.

Dei to skal nyleg ha kjøpt nye røykvarslarar, men det skal ikkje vera desse dei vakna av.

– Dei fortalte at dei vakna av at dei hosta. Eg vil oppmoda alle om å sjekka at røykvarslarane faktisk fungerer som dei skal, seier Gjøsund.

– Ekteparet blei kjørt til legevakt for sjekk, opplyser politioverbetjent Audun Hdler-Olsen.

Strategisk plassert

Røykdykkarar kom seg raskt inn og konstaterte at brannen var i ferd med å spreia seg frå kjellar og opp i hovudetasjen.

Det var fare for at den energirike brannrøyken skulle tenna, noko som ville ført til overtent og totalskadd hus.

– Røyken tente òg, men då sto røykdykkarane strategisk plassert og fekk slått den ned med éin gong.

Ba om backup frå Fana og Samnanger

I tilfelle brannen skulle utarta seg ba Os brannvesen om støtte frå Fana, som sendte røykdykkarar til staden.

Då Hegglandsdalen ikkje har vatn å kopla seg på, ville Gjøsund også ha ein ekstra tankbil for hand.

– Vi klarte oss med vår eigen, men om sløkkearbeidet hadde tatt lengre tid kunne vi risikert å stå der utan vatn. Då er det godt å ha gode naboar, og å kalla dei inn i forkant.

Store røykskadar

Det var krevjande forhold å sløkka i, men takka vera god innsats av Os brann- og redningsteneste er huset redda. Bustaden har fått store røykskadar og er førebels ikkje ein stad å bu.

Brannvesenet er framleis på staden.

– Det kom mykje røyk også etter sløkkinga var over. Vi står igjen for å vera trygge på at alt er sløkt. Det er betre å stå nokre timar for lenge enn å gå eit kvarter for tidleg.