Redda frå fengsel av edru kamerat

I 2-tida natt til søndag fekk politiet melding om ein aggressiv mann utanfor ein av utestadane i Os sentrum.

– Då patruljen kom fram retta han sinnet sitt mot politiet. Det enda med at han blei påsett handjern og planen var å kjæra han til Bergen for overnatting i arresten, fortel politiførstebetjent Kenneth Rastad.

Men så kom ein edru ven av den hissige mannen, roa han ned og insisterte på å overta ansvaret for å få han heim.

Mannen, som er i 30-åra, fekk pålegg om å fjerna seg frå sentrum, noko han i samarbeid med kameraten etterkom. Han blir meldt for brot på paragraf 350 (uroa offentleg ro og orden), men slapp altså unna overnatting i fengsel.

På vandring i 80-sona

Politiet hadde, som natt til laurdag, få oppdrag i natt. Klokka 3 fekk dei melding om støy frå fest på ei adresse nord for Os sentrum.

– Det er eit gjentakande problem på denne adressa, men då patruljen kom fram var festen slutt.

I 4-tida fekk dei melding frå bilistar som var uroa for ein mann som spaserte på E39, i 80-sona på Moberg.

– Patruljen møtte mannen, som var på veg heim og ikkje hadde så langt igjen, så han spaserte vidare.

I løpet av natta blei to bilar avskilta av politiet.