Rekordløp av Sverre Lunde Pedersen!

Etter nedturen i Calgary førre helg gjekk Sverre Lunde Pedersen, seint søndag kveld norsk tid, sitt livs beste løp på 5000 meter.

I fjerde runde i verdscupen, i Salt Lake City, blei det full klaff!

I siste par med canadiske Ted-Jan Bloemen gjekk Sverre i mål på 6.07,61, nesten tre heile sekund betre enn hans førre bestenotering frå 17. november 2013 (6.10,47).

Sverre knuste også den 8 år gamle noregsrekorden til Håvard Bøkko, som var på 6.09,94.

Nesten på pallen

Trass ny norsk rekord blei det ikkje pallplass på Lunde Pedersen.

• Les òg: Kronerulling for Sverre har passert 100.000 kroner

Sverre måtte nøya seg med 5. plass, Nicola Tumolero (Italia) tok 4. plassen med 6.07,50, Moritz Geisreiter (Tyskland) tok 3. plass med 6.07,31 og Patrick Beckert (Tyskland) fekk 2. plass med tida 6.07,02.

Bloemen sette ny verdsrekord

Lunde Pedersen sin konkurrent i siste par, Ted-Jan Bloemen, var i ein klasse for seg sjølv og gjekk i mål til ny verdsrekord på tida 6.01,86!

Den førre verdsrekorden var Sven Kramer sin, og er på 6.03,32.