Robin Hood kom til Strøno

– Middelalderen har sett ut til å fenga elevane og då vi sette opp eit skodespel blei dei veldig engasjerte, fortel kontaktlærar for 6. og 7. trinn ved Strøno barneskule, Anne-Grethe Kolaas.

Dei 13 elevane har øvd, laga plakatar og skaffa kostyme. Dei engelske replikkane lærte dei seg utenat.

– Dei måtte ikkje berre læra å hugsa, skodespelarar må også læra stemmebruk, å snakka tydeleg, å snakka passeleg fort og gjerne overdriva.

Kjører kanskje eit ekstranummer

Fredag var alt klart og alle dei yngre elevane var saman med ungane i barnehagen samla i gymsalen på skulen.

– Skodespelarane var kjempeflinke og framsyninga gjekk veldig bra. Dette har vore god læring, seier Kolaas.

Forteljinga om den treffsikre bogeskyttaren som stal frå dei rike og gav til dei fattige fenga publikum.

No vurderer dei å laga ei ekstraframsyning for foreldrene.