Sakna eitt spørsmål

Bildeserie:

1 av 4

NRK Hordaland er på turné med ferja til Ausekarane og kjører debatt i alle kommunane i fylket.

No ligg ferja i Os, der fleire kommunar har kjørt debatt, og litt over klokka 16 var det nettopp Os-politikarane sin tur.

På denne sida på NRK.no finn du alle debattane.

Panelet besto av Helge Steinum (Ap), Nils-Anders Nøttseter (MdG), Terje Sperrevik (TvS), Marie Lunde Bruarøy (H) og Terje Søviknes (Frp).

Sakna du noko?

NRK spurde om kvifor Søviknes er så populær, noko som leia debattantane inn på blant anna folkevekst, arealpolitikk og skule, om E39 over Bjørnafjorden og om mottak av flyktningar.

Før vi går inn på svara frå politikarane har vi spurd kvar enkelt, med unntak av Terje Sperrevik (TvS), som vi ikkje fekk tak i etter debatten:

Var det noko du sakna å snakka om - og var det noko som var unødvendig å ta opp?

Nils-Anders Nøttseter (MdG): Vi fekk veta tema på førehand, og der var det eitt spørsmål som aldri kom, men som eg gjerne ville snakka om, og det handla om moglege konstellasjonar etter valet. Der ville eg ha spurd Marie Bruarøy om det er varaordførarstolen eller ordførarstolen ho siktar seg inn på. Sånn det er no er det berre Høyre som vil ha Søviknes som ordførar. Eg har inntrykk av at vedtaka som er gjort i dei politiske utvala til no anten er samrøystes eller overkjøring. Er det usemje blir saka avgjort i lukka møter mellom Høyre og Frp, noko som fører til at Høyre si stemme blir lite høyrd. Osingane veit lite om kva dei meiner og kva gjennomslagskraft dei har i desse lukka møtene, og det ville vore interessant å høyra kva sjanse det er for å danna ulike konstellasjonar, også med Høyre. Spørsmålet om Søviknes sin popularitet kunne dei ha droppa, synest eg.

Helge Steinum (Ap): Eg synest det var ein god debatt og eg trur alle synest det var kjekt å vera med på. For dei fleste av oss, kanskje alle utanom Søviknes, var dette nytt og spennande. Debatten fekk tydeleg fram fleire forskjellar på partia. Men eg sakna spørsmålet om konstellasjonar, det ville vore interessant å høyra om Marie ønskjer å bli ordførar.

Marie Lunde Bruarøy (H): Eg var den einaste som ikkje fekk spørsmålet om kvifor Søviknes er så populær. Viss eg fekk svara så ville eg fortald at det truleg er fordi han eigentleg er ein Høyre-ordførar, for det er Høyre-politikk han fører. Spørsmålet om kommunestruktur kunne NRK ha droppa, der er vi einige, og det gjorde også at sekvensen blei kort. Dei kunne heller ha spurd om Liv på Øyro, for der er det usemje. Der har vi fleire parti i opposisjonen som har stemt mot reguleringsplanar som er godt gjennomarbeidde og viktige for vidareutvikling av Os sentrum.

Terje Søviknes (Frp): Å, ja! Kommunestruktur kunne dei ha droppa, der meiner vi om lag det same. Eg skulle gjerne ha snakka meir om skulane, som vi dei andre kom innpå, men der eg aldri fekk replikk. Eg skulle gjerne ha fortald om innhald i skulen og om prosjekta «betre læringsresultat» og «tidleg innsats», seier Søviknes, på veg til ny debatt på ferja, denne gong om fylkespolitikk.

Starta med Søviknes som tema

Helge Steinum blei førstemann som fekk ordet, etter at Midtsiden-journalist Andris Hamre som kommentator fekk seia litt om kva han trur om valet.

Mens Hamre seier han har inntrykk av lite usemje mellom partia, dei er einige om målet, men diskuterer litt om vegen fram, fekk politikarane spørsmålet; kvifor er Terje Søviknes så populær?

Steinum starta med å undrast over det same, ein fleip som slo godt an blant dei rundt 30 i salen, før han sa at Søviknes er populær fordi han ikkje fører vanleg Frp-politikk. Han la samtidig til at Ap vil ta skulepolitikken i ein ny retning, med betre innhald og læringsresulat. Ap-politikaren peika også på Os kommune si høge gjeld.

Søviknes svarte at det kostar å veksa når ny sosial infrastruktur skal byggast, at det er naturleg at Os bygger opp noko gjeld, og minna om at kommunen gjekk med over 40 millionar kroner i overskot i fjor og fint klarer å betjena gjelda.

– Gjelda har vi vore saman om å skaffa oss, problemet er gjerne at Søviknes er flink til å ta æra for alt vi kjøper oss for desse pengane, sa Sperrevik.

– Han er ein god seljar og er flink til å presentera også andre sitt som sitt eige, som når han skryter over innsats for dei svakaste i skulen, men dette er øyremerkte midlar som kommunen har fått frå Staten.

Få flyktningar

Så kom spørsmålet om mottak av flyktningar i Os. Kvifor vil Os berre ta imot 15 når Voss, som er mykje mindre, tar imot 50?

– Her bør vi kunna ta inn fleire, meiner Sperrevik, og viste til at vesle Kvam tar imot 30.

– Vi støtta forslag om 25, men dette blei nedstemt, sa Steinum.

Søviknes og Bruarøy fortalte at innstillinga frå administrasjonen var 10, men at Frp og Høyre auka dette til 15, som blei vedtaket.

– Det er viktig at dei vi tar imot blir godt integrert. Men vi vil få administrasjonen til å sjå om vi kan auka dette noko.

Kommentator Hamre synest debatten gjekk som venta, at den liknar diskusjonane i kommunestyret, men at han er noko overraska over at Høyre og Frp vil sjå på mengda flyktingar på nytt.

– Dei sa rett nok at dei skal «sjå på det», seier Hamre, som styrer debatten på Torget under Bondens Dag i morgon, frå klokka 11.00.

NRK-ferja ligg søndag til kai i Øyane, der Kjell Kjellen og Klypa skal ha show.