Saman om eit godt miljø

Bildeserie:

1 av 4

I omlag tre år har aksjonsgruppa «Lunde nærmiljø» vore i sving for å skaffe tilvegs midlar og innsats for å rusta opp uteområde på og ved Lunde barneskule. Torsdag blei det siste tilskotet på stammen, sandvolleyballbana med olympiske mål, offisielt opna av rektor Berit M. Skorpen og volleyball-eldsjel Geir Lepsøe.

– No kan vi arrangere olympiske leikar på Lunde, i allefall i sandvolleyball, helsa rektor i opningstala.

Bana har dei finansiert gjennom bidrag frå Gjensidigestiftelsen, Sparebanken Vest, eigne midler frå Søre Neset Idrettslag og DnB Sparebankstiftelsen via Noregs volleyballforbund.

– Gjensidigestiftelsen jobbar for eit tryggare, sunnare og meir aktivt Noreg. Difor er eit prosjekt som er tilknytta fysisk aktiviet rett for oss å støtta, seier områdeleier Janne A. Wågenes i Gjensidigestiftelsen.

Aksjonskveld for leikeapperat

Opninga var berre ein liten del av den årvise aksjonskvelden på skulen, kor målet er å samla inn midlar til ny klatrevegg, to utandørs bordtennisbord, benkar og nye fotballmål.

– I fjor samla vi inn omlag 35 000 kroner til ei ny klatrepyramide og ei edderkoppdisse.

– Vi håpar sjølvsagt at kveldens aksjon skal hjelpa oss på veg til å realisera dei nye apparata, fortel inspektør ved skulen, Henrik Johannessen.

Godt for skulemiljøet

Med kafé, Lunde-talent og ymse aktivitetar var det eit høgt aktivitetsnivå blant elevar, foreldre, naboar og andre torsdag kveld.

– Aksjonen er viktig for oss for å skapa eit godt skulemiljø.

– Vi har tru på at det å, tildømes få på plass to bordtennisbord som vi får andre skular veit er veldig populære, vil vera med på å hindra mobbing og skapa eit enno betre utemiljø ved skulen.

– Det at elevane har meiningsfylt aktivitet å halde på med i friminutta er viktig, avsluttar inspektøren.