Ser tilbake på fem fine år i Irisgården

Bildeserie:

1 av 16

I bildeserien over kan du sjå vegen frå video og bowling til sportspub og pianobar i Irisgården.

• Bakgrunn: Slutt for Solsiden

Det starta med at Tore André Sagstad overtok bowling, videoutleige og kiosk då dei i november 2011 teikna leigekontrakt i Irisgården. Os Filmsenter la ned i august same år, og Os Bowlingsklubb hadde i mellomtida halde liv i kulene og kjeglene.

Sagstad satsa og investerte, bygde Iris Bar og Spiseri, byrja å senda fotballkampar då Os Biljard og Sportsbar la ned - og utvida med leigekontrakt i nabolokalet, der Dolly Dimples i si tid heldt til.

I starten var det satsing på mat også her, men det var den enorme responsen på pianobar som gav signal om kva veg dei burde gå om dei ville driva godt. I august 2013 forsvann grunnlaget for å leiga ut film.

Kiosk, videoutleige og bowling blei lagt ned. Satsinga blei i Solsiden-lokalet, på sportsbar og pianobar.

– Vi har hatt langsiktig perspektiv i Hamnevegen, med ambisjonar om å ha ein god plass, og kanskje tena inn igjen nokre av kronene som vi har lagt ut desse åra. Alt har kosta, frå å driva bowling med varierande besøk til å bygga Iris Spiseri, kjøkken og seinare kjøpa skjermar og satsa på Solsiden.

– I fjor låg vi an til å få vårt første år i pluss, vi var på rett veg, men så kom nokre kostnadar og innskrenkingar som gjorde at vi no ikkje fann rom for å driva vidare.

Støytest og konsulenthjelp

Krav om bruksendring og klagar på støy gjorde at det blei tatt tre støytestar i 2016. To av desse måtte Solsiden betala, i tillegg til nokre tekniske utbetringar som følgje av bruksendringar.

I alt måtte han ut med nærmare 300.000 kroner i fjor.

– Alle støytestane stadfesta det same som testen tatt i 2013. Den siste, som kommunen betalte, brukte helsevernetaten i Bergen fem veker på å laga rapport av. Eg fekk 12 dagar på meg. Dette blei rett nok, etter eg ba om det, utvida til 19 dagar, men det er ein fagrapport som krev spesialkompetanse for å forstå og for å svara rett.

– Eg leigde konsunthjelp. Berre det å svara på dette brevet kosta meg 20.000 kroner.

Då enden på visa blei redusert skjenketid til klokka 23 på uterestauranten, i tillegg til at det blei forbode å opphalda seg på utsida, såg ikkje Sagstad grunnlag for å koma på plussida igjen.

– Osingane kjem ikkje ut så tidleg på kvelden, og dei brukte uterestauranten uansett vêr, anten dei røykte eller ikkje. Med ei slik redusering ser vi grunnlaget for å koma på plussida bli for tynt.

Starta opp igjen?

Torsdag blei ein travel og tung dag for Sagstad, med møter med advokater, retten og dei tilsette.

– Då alt var avgjort handla det først og fremst om å få orientert dei tilsette. Eg har vore heldig og hatt med meg ein fin gjeng av hyggelege og dyktige folk, at dei skal mista jobben er det tyngste oppi det heile.

Så blei pressemelding sendt ut, noko som blei etterfølgt av mange hyggelege helsingar.

– Eg er glad i plassen og osingane òg, dei er lette å lika.

– Kva med å starta opp igjen?

– Det er fleire som har spurd om det. Tanken har førebels ikkje svevd meg. Men eg blir å sjå på Os i framtida òg, eg driv eit firma som held på med eigedomsservice, der vi blant anna har vaktmestertenester. Eg har fleire kundar på Os, Irisgården er ein av dei.

Trur på ny vår for osingane

Sjølv om det ikkje gjekk rette vegen har ikkje Sagstad lyst at tidlegare gjestar skal henga seg opp i kva som kunne vore annleis.

– Eit kapittel er over, men det skjer mykje spennande i Os sentrum i månadane som kjem. Nye restaurantar og nye uteplassar skal opna snart, og det vil nok bli mange festlege stunder i Os også utan Solsiden.

– Eg er audmjuk og takksam for helsingane, og alle dei hyggelege åra eg har fått i Os, og håper det kjem gode leigetakarar i det gamle Solsiden-lokalet, uansett kva dei skal driva med.