Skåra 10 mot Tertnes

Bildeserie:

1 av 8

350 tilskodarar fekk god underhaldning då Os onsdag kveld tok imot Tertnes til andre runde i NM.

Publikum var i stor grad med på å skapa stemning, og heimelaget fekk rikeleg med jubel for kvar skåring og redning.

– Det er lett for å stivna litt når du speler mot eit så godt lag, så eg tenkte berre eg skulle klemma til.

– Men eg blei kanskje litt ivrig, det var ikkje alt som var like bra, seier timålsskårar Madeleine Hjertnes etter kampen.

Os - Tertnes 16-39 (9-19)
Målskårarar, Os: Madeleine Hjertnes 10, Emilie Hjertnes, Hilde Kristine Røttingen, Mona Stigen Heggeland, Thiet Dang, Mia Torp Nielsen og Malin Berentsen.

Sjå utvida bildeserie frå kampen.

Begge lag missa i sine første angrep. Tertnes tok leiinga før Emilie Hjertnes utlikna. Så drog Tertnes ifrå til 1-5 før Madde sørgja for at Os heldt nokolunde følgje.

Hilde Kristine Røttingen sette inn 7-14 før Madeleine fekk inn tre til før pause.

Sterke keeperar

Tertnes-trenar Jarle Alvær seier kampen blei omtrent som venta.

– Vi hadde fokus på å halda konsentrasjonen oppe, vi visste at Os nok ville bruka litt tid i angrep for å unngå kontringar. Eg synest Os har sterke keeperar og ein del lovande unge spelarar.

– At vi slepp inn 10 mål i førsteomgang var litt mykje, meiner Alvær.

Vibeke Ingebrigtsen hadde minst fire redningar dei første ti minutta. Dei siste åtte minutta fekk debutant Tiril Thomassen Grønvigh vakta Os-buret, og ho starta med to gode redningar, ein av dei på ei Tertnes-kontring.

– Det var veldig gøy å vera med på, også det å sitja på benken å læra, seier den nye Os-keeperen.

Ungdomane Thiet Dang (16) og Mia Torp Nielsen (16) fekk òg prøva seg mot eliteserielaget, Mia i sin første NM-kamp.

Thiet skåra frå 7-metersmerket og Mia sette inn 14-30 frå vingen.

Tertnes gjekk vidare - og kan samtidig sjå fram til seriestart søndag.