Skåra 7 (!) mål på éin omgang

Bildeserie:

1 av 15

Os ville reisa seg etter tapet for Vestsiden-Askøy i første runde etter ferien, der dei tapte for eit lag som før kampstart låg ti poeng bak.

Heime mot Tertnes blei det likevel ein tam førsteomgang. Begge lag skapte nokre sjansar, men sjansane var ikkje så store.

– I pausen hadde eg fokus på éin ting, å ta ut meir energi. Det var litt sånn i førre kamp óg, at det såg ut som om dei sparte seg, seier Ørjan Håland, assistenttrenaren som leiar laget mens El Fakiri speler.

Gjestane sitt mål kom etter ei misforståing mellom Hassan El Fakiri og keeper Andrew Todd, der Tertnes-spissen fekk vandra fritt og lobba ballen fint over ein Todd på halvdistanse.

Os - Tertnes 7-1 (0-1)
Målskårarar, Os: Marius Mikkelsen 2, Erik Kanestrøm 2, Stian Lunde, Thomas Lunde Fosen og Steffen Ljosheim.
Os: Andrew Todd - Endre Brenne, Torkel Hjertnes, Divaldo Cardoso, Glenn Krossøy - Rafael Villén, Hassan El Fakiri, Torgeir Lunde - Erik Kanestrøm, Marius Mikkelsen og Stian Lunde.
Innbytarar med speletid: Adrian Valle, Thomas Fosen, Steffen Ljosheim, Anders Havsgård og Øystein Takle Eide.

– Eg ba gutane halda fram som i første omgang, der vi hadde grei kontroll og begge lag skapte nokre halvsjansar, seier Tertnes-trenar Jan Eivind Brudvik.

Tertnes starta bra, hadde ballen i laget og lagde nore sjansar tidleg i andre omgang. Den største var då dei sette inn ein spurt og vann ein duell med Rafael Villén, som sto på 16-meteren og nett hadde fått ballen av keeper. Men duellen var ikkje rein nok, meinte dommaren, og Os fekk frispark då Tertnes hadde to mann åleine med keeper.

– Då Os følgte opp med å skåra tre mål på fire minutt rakna det, fortviler Brudvik.

Mikkelsen og Kanestrøm med to kvar

Mikkelsen heada inn ein corner i 53. minutt. Då auka Os-spelarane både presisjonen og, ikkje minst, innsatsen og sjølvtilliten.

Stian Lunda sette inn 2-1 frå høgre hjørne på 5-meteren i 55. minutt, Erik Kanestrøm auka til 3-1 frå spiss vinkel på venstresida i 57. minutt.

Mikkelsen auka til 4-1 på eit skot i 63. minutt før Kanestrøm også sette inn sitt andre for dagen i 66. minutt.

Lunde Fosen sitt første for A-laget

Så tok Os fleire byte. Ein av dei som kom innpå var Thomas Lunde Fosen (18). I 78. minutt var han nær på å bli felt rett utanfor 16. meteren. Men Thomas heldt seg på beina, vendte av ein spelar til og fyrte ballen via stanga ogg inn til sitt første mål for A-laget.

På overtid og stillinga 6-1 viste to andre ungdomar seg fram. Øystein Takle Eide la inn til Steffen Ljosheim, som fekk 7-1 til å sjå lett ut.

Tertnes skapte lite etter at Os byrja å skåra, men kom seg åleine med keeper i 89. minutt. Der var Todd vaken og god og sørgja for at Os-buret heldt seg reint i 2. omgang.