Skåra praktmål for Brann

Måndag spelte Brann 2 x 30 minutt treningskamp mot nyopprykka Åsane.

Osingane Fredrik Heggland og Simen Lassen spelte frå start og heile kampen for Brann mot ein annan osing, Vegard Leikvoll Moberg på Åsane.

Brann vann 4-0 etter tre skåringar av Jakob Orlov og éi nettkjenning av Fredrik Heggland.

Fredrik si skåring kom etter eit raid langs høgresida der han fekk vist både kva fart han har og kor god skotfoten er.

– Eg spelte ein del back på Os, men for Brann 2 har det berre vore halvannan kamp ute på sida.

– Det var kjekt å spela back igjen og sjølvsagt kjekt med ei skåring. Det er ikkje så ofte vi midtstopparar får skyta på mål, seier Fredrik til Midtsiden.

Sjå video av skåringa på Brann.no.

Om han får debut i Tippeligaen i år, eller kva som skjer neste år, tenkjer han ikkje så mykje på i desse dagar.

– Eg skal nok i møte med leiinga i Brann om ikkje så lenge, men det kan godt henda at dei ventar til serien er over.

– No er vi mest opptatt av å unngå nedrykk både med A-laget og Brann 2.

Brann ligg på 15. plass av 16 lag når det står igjen fire rundar. Neste kamp går heime mot Sarpsborg 08 fredag.

Brann 2 ligg på 13. plass av 14 lag når det står igjen to kampar.