Som ein påskedag

Skyfri himmel, fersk puddersnø, perfekt temperatur og lite vind – det blei folksamt i fjellet denne søndagen.

– Vi hadde ein kjempedag med rundt 3000 besøkande, seier Fredrik Tønjum frå Eikedalen Skisenter.

I dag kjørte Eikedalen stolheisen for første gong denne sesongen, og den tok godt unna køen.

Men alle som var i bakken, på langrenn eller hadde hatt helga på hyttetur skulle heim igjen om lag samtidig søndag kveld.

Osingar sto ei stund bom fast ved Jonshøgdi.

– Først var det kø, så sto det stille. Vi frykta at det hadde skjedd ei ulykke, men etter nokre minutt så snigla køen seg vidare, fortel Arne Martin Holen, som hadde vore på ein fin skitur på Kvamskogen.

Trafikken lausna nokre kilometer etter at trafikken frå Kvamskogen hadde fletta seg saman med trafikken frå Eikedalen. I alle fall til avkjørsla til Rolvsvåg og Os.

Ein annan osing sto i lang kø frå Vaksdal til Trengereid.

– Vi brukte 1 time og 20 minutt på 9 kilometer frå Vaksdal til Trengereid, seier Paal Moberg.

Ifølgje BT.no er det framleis kø mellom Vaksdal og Trengereid.