Standhaftig hakkespett

Den siste tida har ein hakkespett tatt tilhold i Kuvågen Barnehage. Til vanleg er det triveleg å få vitjing, men denne karen har vore av det litt meir slitsomme slaget.

– Vi har den siste tida hatt vitjing av Hakke Hakkespett.

– Det tok litt tid før vi oppdaga han, så han hadde klart å laga heile fem hol i barnehagebygget vårt, fortel styrar Marielle Aanes Møgster.

To nye hol

Fredag i førre veke fekk Aanes Møgster snekrar på plass for å bytt dei borda hakkespetten hadde jobba seg gjennom.

– Trur du ikkje da eg kom på jobb i dag at han hadde hakka oppatt to av dei hola som vi fekk tetta på fredag, ler Aanes Møgster.

Spennande

Kvar avdeling har no fått kvar sin planke med hol som hakkespetten har laga.

– Ungane tykkjer det er veldig spennande, men vi må jo freiste å finna ut kva vi skal gjera slik at han ikkje lagar enno fleire hol i barnehagen, avsluttar styraren.