Stemningsfull morgonstund

Kongshaugen Musikkgymnas har gjort det til ein tradisjon å invitera til adventskonsertar i Os kyrkje før dei sender elevane heim på juleferie. Like tradisjonsrikt er at dei startar konsertrekka klokka 07.30 med konsert for tilsette i næringsliv og kommune.

– Eg håper de skal få ein liten time saman med oss, kor de berre kan vera tilstades og nyta det, som forhåpentligvis, blir vakker musikk, innleia dirigent Terje Kleppe fredagens konsert.

Høgt nivå

Og vakker musikk blei det. Midtsiden har vore på morgonkonserten dei siste åra, og vi har vel aldri opplevd eit så høgt nivå på solistar og musikarar som vi gjorde fredag morgon.

– Dette er den første av fem konsertar i dag. Har de lyst til å få med dykk eit litt lengre program, så har vi også konsertar i morgon laurdag klokka 16 og 19, fortalde Kleppe.

Variert program

Konserten fredag baud på eit variert program med gospel, vare juleviser som «Jul, jul, strålande jul» og «Mitt hjerte alltid vanker» til store klassiske verk som Händel sin «Halleluja» og «Panis Angelicus».

Det er ikkje berre song elevane ved Kongshaug beherskar. Dei imponerer like mykje som strykekvartett, brasskvintett og ikkje minst som musikalsk følgje til koret.

Programmet avslutta like tradisjonen tru, som sjølve konserten, med «Deilig er jorden». Sjå klipp frå dei fleste av songane i videoen over.