Store forskjellar i bustadmarknaden

Om du søkjer etter eigedomar for sal på Finn.no er det to tal du kan merka deg; mengda bueiningar og talet på annonsar.

I august låg det på 96-100 annonsar for bustadar i Os, no er talet 63.

Samtidig gjekk snittprisen, i alle fall i Bergen, ned i november, 0,3 prosent, ifølgje bransjeforeininga Eiendom Norge.

• Les òg: Os har passert 20.000 innbyggarar

Korleis er det i Os? Vi har spurt tre meklarkontor.

– Ei lur tid å selja på

Hos Privatmegleren har det gått unna dei siste to vekene.

– Vi har nyleg selt tre einebustadar, to av dei hadde vore annonsert av annan meklar i vår, fortel Herman Brandt.

• Les òg: Os' dyraste hus selt på Berge

Den eine, i Revhaugen i Lysefjorden, hadde 27 interessentar, 20 på vising og blei selt for 5.950.000, nesten på prisantyding.

I Sperrevikvegen blei det 120.000 over det seljar ville ha, selt på første opne vising, den tredje, i Lyngvegen ved Stølsvegen blei det fem bodgjevarar og over ein halv million meir enn prisantyding.

– Når det no er færre bustadar ute, og fleire tenkjer at det nærmar seg jul og ferie, kan det vera lurt å gå mot straumen og kanskje lettare bli lagt merke til. Bustadar som har lagt ute før kan bli sett med nye auge no, seier partnar Arild Vikøyr.

– Bra sal av einebustadar - leilegheiter går treigt

Anders Vangen hos DNB Eienedom seier han merker stor forskjell på einebustadar og leilegheiter.

– Det er normalt at det er litt rolegare på denne tida av året, og 2016 er ikkje noko unntak. Eg har inntrykk av at det er ganske god balanse mellom mengda hus i marknaden og talet på omsetnadar.

Tal frå eiendomsverdi.no viser, ifølgje Vangen, at bustadar i Os i snitt, i 2016, ligg for sal i 42 dagar før dei skiftar eigar. Tilsvarande tal for (heile) 2015 var 32.

Det er skilnad på hustypar;
• rekkehus går i år etter 25 dagar
• tomannsbustad etter 32
• einebustadar etter 47
• leilegheiter etter 50 dagar.

Samla sett er det selt 279 eigedomar i Os i år mot 265 i fjor.

• Sjå òg, Midtsiden samleside: Eigedom

– Det blir samla sett eit greit år hos oss, men leilegheiter går treigt for tida. I oktober selte eg ein einebustad på Lekven for 3.750.000, med 20 interessentar og 4 bodgjevarar. Tomannsbustadar går òg greit, der sette vi i oktober rekord på Hjelle med 3,3 mill., 300.000 meir enn førre rekord i den gata.

– Men leilegheiter går seinare. For 3-4 år sidan var det mangelvare, no er det fleire store og gode nye prosjekt som konkurrerer med privatmarknaden.

Selt før første vising

Åge Gulbrandsøy hos BO Eiendomsmegling har òg opplevd noko rolegare tider etter sommaren.

– Samla sett blir det rekordår hos oss, 10-15 prosent opp frå i fjor. Men hausten har vore litt roleg.

BO merkar det same som DNB, med lågare interesse for leilegheiter, men bra for bustadar store nok for ein familie på 4-5 personar.

– For ein månad sidan selte eg ein einebustad på Kuhnle og ein i Kuvågen, begge gjekk før første ordinære vising. Kjøparane tok kontakt i forkant og avtalte sum med seljar, ein sum litt over prisantyding for å få avtalen i boks før andre fekk sjå huset.

Fleire vil ha privatvising

Hos Privatmegleren fortel dei om stadig fleire visingar utanom «opne» annonserte visingar.

– Huset i Lyngbyvegen blei selt rett etter første visning, etter seks private visingar, til ein dryg halvmillion over prisantyding. Huset i Revhaugen hadde vi fem private og fire opne visingar på, fortel Vikøyr.

– Marknaden er der, men du må vera tilgjengeleg for kunden når det passar. Vi meklarar må rett og slett stå litt meir på i periodar med få objekt i marknaden og litt lågare tempo.