Suksess med fisk og friidrett

Bildeserie:

1 av 16

Onsdag, torsdag og fredag denne veka har Os Turn Friidrett arrangert historias første friidrettsskule på sentralidrettsanlegget på Kuventræ. Det kan ikkje omtalast som anna enn ein kjempesuksess.

– Vi har hatt med 75 ivrige deltakarar, 15 ungdommar som gruppeleiarar og tre trenarar. Ungane har fått forsøke seg på det meste friidretten har å by på. Dei har hoppa, løpt og kasta, fortel Bjørn Michelsen som saman med Åge Gulbrandsøy har tatt seg av det administrative og maten dei tre dagane.

Trøyte barn heim

Tilbakemeldingane frå foreldra er at dei har fått heim slitne og trøytte ungar etter ein dag på skulen.

– Det er ikkje så rart. For mange av dei er dette uvante ting å helde på med og aktivitetsnivået har vore høgt. Det at dei tek seg ut er bare heilt topp.

– Eg må òg nytta høve til å skryta uhemma av dei 15 ungdommane frå 13 til 18 som vi har hatt med oss. Dei har gjort ein kjempejobb med borna og har nok vore minst like slitne som borna etter endt dag.

500 torskenuggets

Kvar dag har ungane blitt servert lunsj, sponsa av Lerøy.

– Vi har vore så heldige at vi har fått startkitet frå Lerøy. Dermed har det blitt sjømat på ungane kvar dag. Onsdagen fekk dei testa røykalaks og sushi. I går gjekk steinbittkarbonadene ned på høgkant og i dag blei jammen meg 500 torskenuggets slukt.

– Også her har vi fått tilbakemeldingar frå foreldra at ungane kjem heim og fortel at maten har vore kjempegod. Det hadde vi kanskje ikkje trudd, men det viser seg at får ungane god og sunn mat, så ét dei godt.

Dusja av brannvesenet

Det har ikkje berre vore friidrett og mat det har gått i.

– I går var vi så heldige å få vitjing av brannvesenet med mannskapsvogn og tankbilen. Det blei eit kjekt avbrekk, kor ungane fekk slappa litt av. På slutten tok brannvesenet og spylte 10 000 liter vatn utover kastfeltet som trengde litt vatning. Det tok ikkje lang tid før ungane såg sitt snitt til å få seg ein dusj, ler Michelsen.