– Takk for maten

På kvart møte i Plan- og bygningsutvalet står rundstykkane klare når utvalet kjem inn frå synfaring. Torsdag fann utvalsleiar Ståle Skaatun det på tide å takka menneskja bak smørbrøda.

– Eg vil på vegne av utvalet berre få lov til å takka.

– De gjer ein utmerket jobb i samband med møta våre.

– Det manglar ikkje på kaffi, mineralvann og nydelege smørbrød når vi set møte, helsa Skaatun gjengen frå kantina i rådhuset.

Det er tilsette ved Os ASVO som driv kantina i rådhuset, kor dei vartar opp med lunsj til kommunetilsette og, som på torsdag, møtemat om det trengs til dei mange møta i kommunal regi.

Plan- og bygningsutvalet avslutta sitt siste møte før jul med å samlast til pinnekjøt i kantina, tilrettelagt av nettopp gjengen frå Os Asvo.