Innfelt, maleri av Dag Thorkildsen. Onsdag ettermiddag er det vernissasje.

Tidleg sesongstart på Vedholmen Galleri

Onsdag opnar galleriet si første separatutstilling i 2017, med abstrakte maleri av Dag Thorkildsen.

Av: Kjetil Vasby Bruarøy

Onsdag ettermiddag er det sesongopning ved Vedholmen Galleri, som har rekordtidleg opning av ny utstilling.

– Det er med stor glede og ære å kunne ønske velkommen til Dag Thorkildsen si første separatutstilling hos oss, seier gallerist og kunstnar Vibeke Harild.

Thorkildsen, som fyller 68 år i år, starta kunstnarutdanninga si på slutten av 60-talet, var festspillutstillar i 1978, har stått for utsmykking i fleire offentlege bygg og vore høgskulelektor ved det som i dag heter Kunst- og designhøgskolen i Bergen frå 1980.

– Dag Thorkildsen sine maleri er abstrakte. I maleriet vender han seg vekk frå einkvar konkret avbilding av vanlege gjenstandar og former, og vektlegg andre aspekt, som farge, rom, lys og komposisjon.

– Han utrykker ei spesiell stemning eller ein tanke som publikum kan ha som følgetråd for eigne erfaringar eller opplevingar i møte med hans kunst, seier Vibeke, dagen før opning.