Tilbygg til dobbel pris?

Bildeserie:

1 av 2

Måndag 10. februar var det byggestart på Kuventræ. Vestafjell, som har rammeavtale med Os kommune, byrja på grunnarbeidet medan andre handverkarfag var på anbodsmøte.

– Når vi summerer tilboda vi har fått inn, der tilbydar førebels er anonymisert, ser vi at tilbygget på skulen blir cirka dobbelt så dyrt som det som er sett av, sa prosjektansvarleg i Os kommune, Tor Inge Døsen, i kommunestyremøtet tysdag kveld.

Frp, Høgre, Venstre og KrF har i sitt felles budsjett sett av 10,5 millionar kroner til utviding av skulen på Kuventræ, for å unngå bussing av elevar til andre skular som er mindre pressa på areal enn Os og Kuventræ.

Ba om hastevedtak

Sidan det er mål om å ha tilbygget ferdig til skulestart i år, er tida knapp.

– De må bestemma dykk i dag om kva de vil. Vi kan ikkje venta til neste kommunestyremøte, sa Døsen, og la fram t alternativ:

1. Bygga det som er planlag, 4 klasserom med tilhøyrande grupperom og garderobar, i tilbygg på 480 + 220 kvm, sjølv om prisen blir cirka dobbelt så høg som venta.

2. Finna ein annan veg fram, eit alternativ Døsen frå administrasjonen foreslo.

– Eg reknar med at vi kan få bygd eit modulbygg med fire klasserom, på til saman cirka 480 kvm, for rundt 12-13 millionar kroner.

– Det går ei grense på 500 kvadratmeter når det kjem til enkelte tekniske krav, så det kan vera eit poeng å halda seg under denne grensa om vi skal spara pengar.

A- og B-kvalitet?

Espen Aspenes (Frp) ba om ordet og ville sikra seg at ikkje ei eventuell avgjerd om modulbygg og tilhøyrande direkteanskaffelse var noko kommune si juridiske avdeling kunne få rett i fanget i etterkant.

Han stilte også spørsmål om modulbygg kunne bli sett på som dårlegare kvalitet, at det blei ei B-løysing.

– Dette med direkteanskaffelse ligg i saka, det er opna for dette på visse vilkår. Vi tilfredsstiller fleire av desse, blant anna det at vi har hastverk. Tidfaktor er viktig, og truleg medverkande til at tilboda vi har fått inn er med så høg pris, svarte Døsen.

– Modulbygg blir sett opp fleire plassar, blant anna som skular og sjukehus, og det skal ikkje vera noko å seia på kvaliteten. Men enkelte vil kanskje seia at det estetisk ikkje tar seg like fint ut som eit plassbygd hus.

Langt gruppemøte

Døsen informerte om budsjettsprekken før pause i gårsdagens møte. Pausen blei kombinert med gruppemøte, og budsjettkameratane Frp, Høgre, Venstre og KrF kom nesten eit kvarter for seint tilbake frå gruppemøtet.

– Vår konklusjon er at vi sit igjen med fleire spørsmål enn svar i denne saka. Vi lurer også på om det finnest fleire alternativ enn desse to, sa ordførar Terje Søviknes (Frp) då kommunestyret var i gang igjen.

– Vårt forslag blir at vi delegerer makt til endeleg avgjerd til formannskapet, så vi får nokre ekstra dagar på oss. Det er enklare å samla desse ni medlemmane, enn heile kommunestyret.

– Korleis hamnar vi i slike situasjonar?

Det var brei politisk semje om å kjøpa seg nokre dagar ekstra, og å gje formannskapet makt til å fatta avgjerd i saka.

Men både Lars Atle Skorpen (Ap) og Ingrid Netland (Sp) poengterte dilemmaet Os kommune sto ovanfor.

– Korleis hamnar vi i slike situasjonar? Det er ikkje første gong, heller, sa Skorpen.

– Eg har ikkje finrekna på det, men er ikkje dette noko posisjonen burde sett for 5 år sidan og byrja å gjera noko med for 2-3 år sidan?

Netland var endå mindre nøgd.

– Eg blir heilt matt, dette held rett og slett ikkje! Dette viser at vi har ein vekst som er ute av kontroll, mykje fordi vi seier ja til alt, og då heng vi etter med tenesteproduksjn, både skule og helse.

Både Helge Olav Nygaard (KrF), Espen Aspenes (Frp) og Eirik André Hesthamar (Frp) kom med replikk til Netland.

Aspenes lurde på om ikkje Senterpartiet også ville sikra seg at vi fekk mest mogleg ut av kvar hastekrone på Kuventræ, Hesthamar sa han heller vil bu i ein vekstkommune enn ein fråflyttingskommune.

– Dette er ikkje den stoltaste dagen eg har hatt på denne talarstolen, eg synest vi skal vera audmjuke alle saman. sa Nygaard.

– Vi vedtok ein skulebruksplan i 2010. Sjølv om vi opplever eit visst press, må vi halda oss til denne planen.

Utvida formannskap?

Netland ba om at gruppeleiarane også fekk delta i formannskapet.

– Det er berre formannskapet som formelt organ som kan beslutta dette, orienterte Søviknes.

Han bad gruppeleiarane diskutera saka med representantane dei har valt inn, sånn at dei presenterte gruppa sitt syn på saka.

Det blir også mogleg for gruppeleiarane å senda spørsmål og innspel til møtet. Desse må sendast innan kort frist, truleg i morgon, torsdag.

Forslaget om å utsetja avgjerda til formannskapet blei samrøystes vedtatt.