Tivoli på veg til Os

Scandinavian Tivolipark, som dei siste åra har besøkt Os same helg som marknadsdagane, blei i år éi veke seinare.

– Vi har vore på Sveio og i Odda, og har køyrd nokre av karusellane direkte til Os mens vi denne helga har vore på Sotra, fortel Roy Andersen.

– Tivoliet vårt er rusta opp, med nye trailerar og fleire nye karusellar, men det var ikkje alt vi fekk plass til på Sotra. Til Os kjem vi med full pakke.

• Sjå bildeserie frå tivoliet i Os i fjor

Blant det nye er to karusellar, blant anna ein twist, ein barnekarusell og ei stor sklie.

– Vi har satsa litt på dei yngste, men må ha noko for ungdomen òg.

Fire dagar i Os

Tivoliet opnar førstkomande torsdag og blir i Os til søndag.

– Det har blitt litt lettare å driva no, etter at nye reglar har gjort det noko vanskelegare for svenske tivoli å koma inn her og ta toppane i nabolandet.

– I løpet av dei siste ti åra er talet på tivoli i Noreg redusert frå rundt 20 til 3. I år har det vore stor pågang frå byar og tettstadar som ønskjer tivoli, men vi rekk ikkje besøka alle. I Os har vi alltid hatt det bra, så Os blir ståande på turnéplanen.

Det er meldt opphaldsvêr og 15 - 20 gradar i Os torsdag til søndag.