Tømmernes bru snart ferdig

Bildeserie:

1 av 10

Etter 17-18 dagar med gangbru og parkering langs Byvegen kan dei 15 bustadane på Tømmernes snart køyra over brua igjen.

– Onsdag kveld eller torsdag skal vi kunna køyra over brua igjen, seier dugnadsleiar, primus motor Arild Tømmernes.

Faren hans, Jan Arvid, er ein av pensjonistane som med i dugnadsgjengen, bestefaren og oldefaren var med på å bygga førre bru.

Brua blei bygd i 1936. Prislappen var, ifølgje Jan Arvid, 3.200 kroner.

– Det har vore ein enorm dugnadsinnsats med deltakarar frå så og seia alle husa her inne. Eldstemann Eivind Fjelltveit (76), som er tidlegare murar, har vore ein av dei ivrigaste, fortel Arild, som er utdanna forskalingssnekker og driv for seg sjølv som tømrar.

Tar halve rekninga

I fleire år har tilstanden på den 80 år gamle brua vore dårleg. Dekket har blitt slite av og det har vore lapping av brua for at ikkje innbyggarane skulle køyra på rett armeringa.

– Då kommunen ville rusta opp med tredekke på stålbjelkar, noko som ville gje akseltrykk på 8 tonn, sa vi nei. Vi vil ha ei bru for framtida.

Oppgraderinga av brua kjem til å kosta i underkant av to millionar kroner eks mva.

Med dugnadsinnsatsen reknar «Team Tømmernes» med at prisen kjem ned i 1,8 til 1,9 millionar. Os kommune betaler cirka halve brua.

– No har alle husstandane spytta i 50.000 kroner kvar, førebels, i tillegg til dugnadsinnsatsen.

Les òg: Vil løyva 1 million til bru

– Det er 15 hus og to tomter her inne. Med 8 tonn akseltrykk kunne vi gløymd for eksempel å få ein betongbil inn her. No får vi 16 tonn akseltrykk, god nok for nærmast kva som helst.

Bygde gangbru på under fire timar

Den gamle brua er løfta vekk og skal pikkast i betar. Stålet er det avtale om henting av.

– Det er meir papirarbeid med ny bru enn oppgradering, så dette er berre ei oppgradering.

Nytt fundament er støypt utanpå det gamle, men det er pæla på nytt, så det nye fundamentet står på eigne bein.

– Vi hadde blitt fortalt at vi kunne gå på gamlebrua mens det var pæling, men sånn var det ikkje likevel. Då måtte vi bygga gangbru i ekspressfart.

Frå klokka 19 til 23.30 blei gangbrua bygd.

Den blei tilpassa sånn at brannvesenet kan koma over med ATV, i tilfelle utrykking.

– Det har fungert greit med gangbru desse to vekene. Etter at alle betongelementa er på plass gjenstår litt støyping mellom elementa, og litt stein i kvar ende av brua, så kan vi køyra på den igjen.

– Etterpå tar vi rekkverk og anna arbeid med ferdigstilling. Gangbrua skal rivast, fortel Arild Tømmernes.