Tre firma flyttar inn i Sentrumskvartalet

Bildeserie:

1 av 2

Det rundt 400 kvadratmeter store lokalet, som fram til 31. juli i år husa den 94 år gamle jernvaren til S Tvedt AS, er i ferd med å bli delt i tre.

Det midterste lokalet, hjørnet mot Os Taxi og Byvegen, har fått leigetakar som skal husa tre ulike firma.

– Vi har vurdert flytting i 4-5 år, og så vidt sett på ulike lokale både i Os sentrum og på Amfisenteret, men då denne sjansen kom ville vi ikkje lata den gå frå oss, seier medeigar og dagleg leiar Åge Gulbrandsøy i Bergen Omegn Eiendomsmegling AS.

Han overtar lokalet 1. desember og vil bruka julemånaden på flytting frå lokalet ved Ulvenskiftet.

– No er vi fire tilsette, og vi trengte meir plass. Med kontor midt i sentrum kan vi òg bli meir synlege, og kanskje få endå fleire oppdrag. Sjølv om marknaden har vore noko rolegare, har vi eit rekordår i år, bustadane i Os går framleis unna, berre ikkje i same tempo som før.

– Kor mange hus har du for sal nett no?

– 15 einingar. Vi har nokre andre òg, som skal ut i marknaden, så når vi opnar her så blir det med litt ferskvare i utvalet.

Styling i Noreg og eigedom i Spania

Lokalet som BO Eiendomsmegling leiger er rundt 110 kvadratmeter. Her får dei plass til både eigne tilsette, og til å bygga inn eit kontor til drivar av to andre eigedomsrelaterte selskap.

– Vi er mykje ute i felten, og har til no drive frå heimekontor, seier Siv Bruvoll frå Style Din Bolig AS.

Selskapet hennar har fem tilsette, fire av dei på fulltid.

– Med eit tilgjengeleg kontor som dette blir det enklare å også driva rådgjeving, at kundar som skal innreia ny bustad, eller pussa opp, kan koma innom og skildra bustaden sin, så kan vi hjelpa med alt frå fargeval til møblering.

Bruvoll har òg drive med sal av eigedom i Spania i 15 år, både mens ho frå 2002 til 2004 budde i Spania, og heime.

– Aktivitetsnivået var høgast fram til 2008, men eg har halde på med dette på si, og har i år selt fire bustadar i Spania.

– No har vi selskapet ZiCasa Eiendom Spania, og trappar opp. Eg har inntrykk av at mange sat ei stund etter finanskrisa og venta på at prisane i Spania skulle stupa, men no er dei på veg opp, så for dei som har sete på gjerdet er tida moden for å koma ned og byrja å leita etter draumebustaden.

Har 170 kvadratmeter ledig

Arne Njøten, stryeleiar i AS Sentrumskvartalet AS, seier interessa for dei ledige lokala har vore god, ikkje minst etter at det største no blei delt i tre.

– Vi har ein interessent på lokalet på sørsida, nær inngangen til rådhuset. Dette er på rundt 100 kvadratmeter, seier Njøten, som ikkje vil røpa kva bransje det er snakk om, anna enn at det er snakk om detaljhandel.

Spesielt innan sal av mat, også norsk daglegvare, har vore stor. Men etter at Asiatisk Mat Osøyro blei leigetakar i lokalet der leikebutikken heldt hus, har styret sagt nei til dei neste som har kome.

– Det som av mange blir sett på som best for detaljhandel, hjørnet mot Øyro, med baldakiner og ny stein, er framleis ledig. Dette lokalet har salsflate på 170 kvadratmeter, ein storleik som kan passa til fleire typer verksemd.

– I kva grad vil styret bestemma kva bransje som skal inn, for å gjera tilbodet i Os sentrum mest mogleg variert?

– Vi ønskjer at komande leigetakarar skal vera med på å styrka sentrum, og at dei skal vera mest mogleg publikumsretta. No har vi fått inn asiatisk mat og sal av ulike eigedomar, og har detaljhandel på gang. Men vi må òg ta omsyn til marknaden, dette er ikkje det einaste ledige lokalet i sentrum. Samtidig har ikkje eigarane av lokalet det travelt.